「侵侵」於周三發表了上任以來的首份國情咨文，內容主要有六個：一、企業同中產可減稅，創造百萬就業；二、一萬億美元基建方案，美國貨品行先；三、公平貿易，外人不得再搵美國人笨；四、取締醫改，節省醫療成本；五、堅拒假移民，加快起邊境牆；六，大幅提升國防開支，情願響第二度慳番！語畢，道指於即晚就已經high到爆！
有口痕友話，「侵侵」講嘢永遠都係得個「廊」，入面根本就無餡嘅！有人就認為咁至好，代表「侵侵」放棄咗一言堂，政策的明細就留番畀大家去諗喇！咁都得？你咪理，總之道指於周三衝穿了21,100點！就算RSI去到85又點？我唔會學似班名宿咁估美股見頂，真係十個估頂十個燈！
恒指昨日高開200點，不過最終要倒跌收！我認為市場係想借呢個時候開逃生門，然後便炒作聯儲局於三月十五日加息的可能性達到80%！
因此，當恒指於早上彈逾200點時，我便號召群組裏面幾百位粉絲出多啲貨，揸cash等加息。
有些等撈貨的人就問：「既然大家都知道月中要加息，恒指會唔會已經priced in咗呢？萬一到時唔加息的話，我豈不是兩手空空，睇住火箭升空？」上月十七日，我於本欄叫大家keep貨，揸到大市失落千億成交嗰日先至走，驀然回首，我能夠於上月二十日貼到24,200點水平減倉都算係準吖！
係咁，不如再信多我一次呢，我睇恒指下方的支持於23,572點同23,174點，到時企穩/有陽燭，而北水無再淨流出先掃貨啦！揸多陣cash無蟻咬嘅！
富昌金融研究部總監 譚朗蔚（作者為註冊持牌人士）