高盛有位超級燈神辭職唔撈！高盛首席外匯策略師Robin Brooks發電郵通知啲客，佢仲有幾日就離職。
佢話自己一○年加入高盛，高盛教曉佢點將問題歸結番本質、用簡單方式同圖表去講件事。佢話呢幾年佢就係做呢啲，仲好愛工作嘅每一分鐘。
Brooks今次走，佢啲華爾街行家話都幾出乎意料喎。不過絲絲睇番，佢都算係「明燈」一盞。
佢有幾「燈」？就咁嘅，日圓同佢似乎過唔去。佢舊年四月廿四日估日圓未來幾個月跌，日圓唔夠幾日即勁升；佢五月初轉軚睇好，日圓第二日就開始一路跌；五月尾佢睇淡，點知日圓當日就升番畀佢睇。屢敗屢戰，佩服；屢戰屢敗，絲絲一樣係個「服」字。
余絲韻