絲絲講場：「鱷王」達利奧又嗌引退
全球最大對沖基金Bridgewater（橋水）管理層大地震！「鱷王」達利奧（Ray Dalio）又宣布引退，下月辭任其聯席行政總裁（Co-CEO），不過就會繼續做聯席首席投資總監一職，希望可以減少花喺管理公司嘅時間，擺番多啲心力去做投資。原本傳過有機會做佢接班人嘅聯席行政總裁魯賓斯坦（Jon Rubinstein）就要起身。
查實鱷王七年前退下過火線一次，不過舊年年初又回朝主政，依家又話再退唔搞管理淨理投資，佢話自己好鍾意個Market（市場），除非公司唔要佢，否則到死都要喺Bridgewater做投資。
帶領基金跑贏標指
喺達利奧領導之下，Bridgewater嘅旗艦基金自營運以來，撇除收費後嘅每年回報有12%咁多，跑贏標指連股息同期升9.6%嘅表現，公司點敢唔要佢。
至於要起身嗰位Co-CEO魯賓斯坦出身自Apple Inc.，有「iPod之父」之稱，佢舊年五月加盟Bridgewater嗰時幾咁風光，當時Bridgewater睇中佢嘅科技底，話公司需要有個科技經驗強勁嘅人帶領，仲傳佢有機會接鱷王班。點知依家做唔夠一年就要起身。起身理由係乜？鱷王公開話，魯賓斯坦同公司文化唔夾喎！
魯賓斯坦唔係第一個畀鱷王踢走嘅「接班人」，入得佢公司，玻璃心免問。咁搞法，鱷王幾時真退呢可？
余絲韻