上個星期，網上的巴打都在熱議大台播映的一個真人騷，內容是講述幾位年輕人透過不同的方式去追夢──而他們的夢就係一層樓！
在香港地，買樓真係愈來愈似一個夢。尤其是當我們打開報紙，看着一個又一個的內地財團來香港以天價投地，我便懷疑「夢」這個字，係咪已經反映唔到這種虛幻同遙遠。
以前，我們呻香港哋高樓價是源自地產商的霸權，Sorry呀，我諗好快大家都要改口了，原因是那些以往經常畀我們詬病的本港地產商，他們依家都已經淪為受害者，是苦主了。事關中資的新勢力正抬頭，無論他們本身於內地係發展商又好，唔係都好，本地發展商都未必是他們的對手。
上周末，龍光地產（03380）以及合景泰富（01813）就合資以168.6億元投得鴨脷洲的一幅地，呎價高達2.2萬蚊！如果以海航年初以13,600蚊的天價投得啟德地皮相比，可真是天外有天！
值得留意，兩家公司的市值都只有184億元同149億元，卻做緊相當於自身市值的刁呢！明明是蛇吞象，但又接連發生，猴擒得好恐怖！
昔日的「霸權」（地產商），你以為打倒他們就會有餐安樂茶飯吃？可是現在於他們的頭上又來了一種「霸霸權」，令以前的莊，今日都淪為閒了！海航錢多，又點會只係來香港買兩塊地吖？人家連德銀的3.04%股權都到手喇！你又估吓佢哋等唔等錢使？如果係咁，佢哋又似唔似會打折來賣個大包畀你住？
內地大款用天價來攞麵粉，去搭建宮廷同做太空價的麵包，財大氣粗姿態明顯；本地發展商就無本事陪人癲喇，於拍賣場上又唔夠人地舉，咪惟有向我們這些小市民開刀，整啲三、四百萬的餅碎，出來畀班年輕人買囉！
富昌金融研究部總監 譚朗蔚（作者為註冊持牌人士）