絲絲講場：蓋茨臨終最想見到嘅係……

唔計普京，帳面上全球首富係微軟創辦人蓋茨，佢周一喺社交網站reddit搞一年一度「問乜都得」，一晚已過萬條網民留言，乜都有人問。

盼電腦識睇書考試

有生之年最想見到嘅科技發展係？蓋茨話渴望電腦能似人一樣閱讀與理解資訊，佢嫌依家嘅電腦仲未識睇書學習或考試。咁點樣阻止AI（人工智能）滅絕人類？佢話首要係超級AI嘅創造者本身要有正確價值觀喎。

佢十五年後會點？佢話到時自己76歲，希望做咗阿爺，除咗想全球貧病情況改善外，佢望自己到時打字仍然夠快，唔使人幫就答到「問乜都得」。

笠帽陪仔巡大學

佢想同19歲嘅自己講番句咩？佢話醒目唔係咁片面，亦都唔係當時諗咁重要，40歲之前應要探索發展中嘅世界。佢又話自己當年唔曉交際，就算提醒亦未必改得到，可能只有硬住頭皮去尷尬同經歷，然後成長。

被問到為父之道？佢話自己剛同17歲阿仔巡咗六間大學，事關阿仔想睇入邊間，程Trip係佢父子共處嘅好時光，阿仔仲揀書佢睇添。佢又話出街想低調會戴帽，少啲人認得，佢可以全程專注對住阿仔。

有人抵死問蓋茨，能否唔助跑就咁跳過一張電腦櫈？No，佢話自己做開運動如滑雪及網球，打網球係唔使跳嘅，雖然「有啲人會跳過個網，不過呢樣唔屬於網球運動嘅一部分」。

如果呢個世界佢只能揀一件三文治，會係？佢連答三次「Cheeseburger, Cheeseburger, Cheeseburger」。不過，絲絲就好疑惑，點解芝士漢堡都算係三文治嘅？

余絲韻