周三上市的駿傑集團（08188）於掛牌只有半日的情況下，被證監會勒令停牌，事件令市場好震驚！據聞今次的決定係證監引用上市規則第8（1）條召喚聯交所叫停駿傑的，理由係「股份於今早市時段的活動及股份價格大幅上升，在股份的交易中似乎沒有一個公開市場」喎！
不過，駿傑於一個上晝都係升5.5倍啫，講癲，算老幾呀？我記得上年四月十日隻「翠如BB」（聯旺（08217））於創業板全配售上市，股價於首日收於4蚊，較配售價升足14倍，成276倍市盈率都未停啦！
係咁我惟有話證監依家已經學精咗啦！事實上，他們的守門員較早前先後盤問心心芭迪貝伊（08297）、尚捷集團（08183）同浩柏國際（08431），結果幾間公司紛紛押後上市。今次駿傑之所以上到，並唔係因為證監漏咗波，只係公司知規矩啫，不過最終咪都係停！
玩得半日就關機，可憐的是一批用真金白銀來買了股的朋友啫，唔知要等到幾時先甩到身！無買的都可以視今次事件為教訓，警惕自己日後凡有全配售的創板上市就要打醒十二分的精神！
富昌金融研究部總監 譚朗蔚（作者為註冊持牌人士）