絲絲講場：時計寶主席點「簡」手機？

得到董生垂青嘅愛機，係部黑色襯銀色包邊嘅Nokia C2-01，二○一○年推出，講緊都有成六、七歲嘞。唔通係見有傳聞話Nokia會推出神機3310嘅復刻版，所以都跟風玩懷舊？原來董生話覺得「簡單就係快樂」，做人果然夠泰然！

佢又話上次去日本焗桑拿，諗住部電話仔唔會有人吼，點知轉眼間就畀人偷咗，真係得啖笑！不過董生都照舊買番同款繼續用，認真長情。唔好以為董生Out，其實佢亦有部iPhone，不過由秘書幫佢拎住。

搞宣傳活動好過代言人

董生一手湊大嘅品牌天王錶近年都有擺上內地電商平台賣，佢有意將電商佔整體銷營額嘅佔比提高到25%。好多手錶品牌都會請明星代言，但係董生就覺得好不切實際，仲話使大筆錢請代言人對實際銷量無乜幫助。冇代言人唔緊要，佢話每年喺內地搞成過千場宣傳活動，提升知名度冇難度。

講講吓，搞到絲絲都想買部Nokia電話傍身，搵番反璞歸真嘅快樂。

余絲韻