絲絲講場：滙豐晒神秘隧道轉移視線？
獅子行滙豐控股（00005）前日公布業績，一字記之曰：差。除引嚟股壇中人狂插，就連前華人大班劉智傑都發火。唔知係咪想大家放過佢，獅子行尋日忽然喺自己個facebook專頁晒條傳說中總行地底嘅神秘隧道，帶大家遠離吓啲凡塵俗事。
滙豐一向算用心經營個facebook專頁，時不時都會分享小情小趣。尋日就上載咗一篇冷知識，講起原來中環滙豐總行地底有條極之神秘嘅隧道，仲話條隧道夏季每秒引入1千公升海水，一日就引入足以注滿34個奧運會標準泳池，用嚟幫大廈冷氣系統降溫，揭露咗總行嘅神秘一面。
網民想參觀 「管理員」Say No
唔少粉絲都留言話有興趣，問「地鐵咩出口可以去到」，又想知「會唔會諗吓開畀公眾參觀」。滙豐facebook管理員都好有耐性咁解答，話呢條地底隧道係滙豐私人地方，未能對外開放，所以冇港鐵出口可以到達。
仲有網民話「聽聞入面曾有喪屍出沒！故極少人前往！居於附近的居民亦禁（噤）若寒蟬！」講到咁，絲絲好想去參觀呀！
余絲韻