上月十一日，阿里巴巴相中了銀泰商業（01833），並計劃以後者來實現佢老細口中的「新零售」規劃。所謂「新零售」意思即是非單一的線上電貿，而是配合線下的實體店和零售點，加強出貨的管道。從此，線上同線下再不是相互競爭而是互補。我於當日就借本欄分析了另一隻容易被線上巨擘相中的筍盤──高鑫零售（06808）。
結果，公司上周五終於有好消息！有傳集團旗下的大潤發超市獲洽購，而潛在的買家包括騰訊控股（00700）、阿里同蘇寧等。香港股民見到個陣容，登時係兩眼發光！誰不知，股份於早段升逾7%之後，便於午後停賽，到周末才澄清：係就係有人洽購，不過就唔係騰訊同阿里囉！消息一出，股價於周初連冧兩日，累積跌幅一成半！
到底做錯咗啲咩？高鑫股價於誤傳消息之前，明明做緊8.17元收市的，依家只係市場唔覺意吹大咗，再從天堂跌返落凡間啫，犯不着要跌到昨日收市報7.3元呀嘛？
睇番業績，集團於截至去年底的股東應佔溢利有25.71億元人仔，按年有得升，派末期息23港仙，都較一五年同期的19港仙高喎！唔通真係因為有大行出報告話要沽，仲話睇6.3元就搞成咁？
非也！我諗問題是出自CEO把口，佢話售大潤發可能性低！講真，線上線下結盟早已經是零售行業的營運新方向（起碼有「新零售」規劃之前我已經炒緊），既然確認了賣大潤發只係市場一廂情願的話，就即係憧憬入錯價啦，咁自然就要還返晒啲升幅出嚟。
換言之，高鑫股價有機會抵銷返一月以來的升幅，落番去6.95元先識停喎！
如果係咁，粉絲們係咪應該轉移關注另一筍盤，例如是線上擁有「掌上金鷹」客戶端，而線下則擁有G-MART精品超市的金鷹商貿（03308）呢？
富昌金融研究部總監 譚朗蔚（作者為註冊持牌人士）