絲絲講場:千禧代:實唔夠錢退休

千禧代(即是80後打後,00年前出世嗰批)到退休時好大鑊,尤其係中產嗰啲!最新嘅調查顯示,有三成嘅亞洲千禧代認為自己無法儲夠錢供退休用,仲有四成人預計自己退休時連樓都未供完仍有一身債。

點計個人所需退休儲蓄?最簡單就係先預算你退休第一年嘅開支,將其乘25倍(依家一般人80幾歲命好平常)。當你預計退休第一年用20萬元(計晒衣食住行,慳慳哋一個月約9,000蚊差唔多),咁退休儲蓄就要500萬元!嗱,仲未計通脹。

七成人諗要繼續捱

不過,根據宏利資產管理調查,亞洲(中、港、台、星、馬、泰、菲律賓及印尼)嘅中產千禧代退休前只預計自己儲夠退休首年開支嘅8.2倍,同標準嘅25倍差一大截。

想退休前減少個人開支儲多個錢?近三成千禧代有照顧父母同養細路嘅觀念,比上一代多一成,日常開支會更大,惟有減少儲錢與投資。有43%預計自己退休時身體未必可以應付工作。但竟然有71%人諗住就算到咗退休都要出嚟做嘢搵食!

40%料層樓未供完

有層樓好啲?45%諗住置業等老來收租,但分析話依家經濟模式變緊,上一代就話可以靠層樓,將來樓市會點冇人知。調查仲見到每十個人有四個預計退休時層樓都未供完!

點算?宏利亞洲總裁兼首席執行官高瑞宏(Roy Gori)話,年輕人必須盡早開始儲蓄及投資,否則為時已晚,後悔莫及。絲絲提句,要分散投資,唔好齋諗住有樓萬事足。

余絲韻