孖妹Ｓ檔案：金融小花股壇鬥靚績

成日都話女人係水造，可能部分正確啦！孖妹覺得女仔堅強起上嚟係可以好硬淨，事業發展亦可以巾幗不讓鬚眉，雖然金融界一向都係陽氣極盛，之不過，間中都會有新進小花出沒，你咪以為人哋只係「花瓶」，講起股嚟真係養眼之餘又Talk得，唔係講玩，難得搵到實力同姿色兼備嘅靚女，梗係要介紹畀股友識啦！

金融小花股壇鬥靚績

了解各行炒熟唔炒生

劉：財經網誌作家、理財顧問兼Freelance模特兒劉慧詩（Josephine）

Kitty：又係Model，又係理財顧問，你應該多謝媽咪生到你美貌與智慧並重！

劉：其實我中學讀商科，嗰陣Miss會講買乜股好，16歲開始會同媽咪喺屋企講股經、傾股票行業發展等，同埋幫佢用電腦落盤，所以開始對股票產生興趣，讀大學入咗工商管理系，自己都有留意股票，初初出嚟社會工作就做保險，兩年前用十萬蚊本金開始炒股，同埋喺網上寫股評，我特別鍾意用生活體驗同埋觀察時事去分析市場走勢。

我自己嘅炒技係喺媽咪身上學同埋上堂學番嚟。媽咪一向都係用好傳統嘅師奶炒法，係主力價值投資，呢種方法主要適用於中至大型股，有時有不利消息令股價下挫嘅話，若經分析後係唔影響業績，就會出動撈貨；上堂就學過基本及技術分析、波浪理論、江恩理論等，多數會用多種方法配合做分析，若短線炒細價股，就主力睇上市公司通告。

財經網誌作家劉慧詩稱，喜歡以生活體驗及透過觀察時事去分析市場走勢。（朱晉呈攝）

劉慧詩（Josephine）小檔案

勤刨料拒齋聽貼士

彩兒：你股齡尚短，應該都交唔少學費啦？

劉：我輸得最甘嘅一次係舊年，聽人哋啲冧巴買一隻能源股，佢係細價股嚟，我放咗約6,000元落去，一路喪跌，跌到最近個本得番600元，完全冇止蝕，呢次係一個小教訓，其實畀貼士我個朋友係話莊家貼士，好準，所以搞到綁死咗半年，我依家惟有同佢鬥長命，博佢第日賣殼！

以後即使係朋友講到「莊家就喺我隔籬」都好，我都唔會齋聽貼士就亂入市，其實我都認自己係病態賭徒，經過呢一仗就好咗，要自己先做功課、搵資料先入市，同埋知道定好止賺同止蝕位嘅重要性，以前初炒股試過蝕多多、賺少少，要同呢個情況講拜拜，就需要學識忍痛止蝕，同埋到目標價就止賺，因即使隻股再升，都唔係自己能力範圍內贏到嘅錢。依家投資中、小型股，最少會觀察三星期先入市。

Kitty：你兩年累計回報有五成，都算打破靚女只可做「花瓶」嘅魔咒喇。

劉：我睇得最準係前年大時代嗰陣，完美捕捉到一隻騰訊控股（00700）窩輪，賺幅有約十倍，當時放咗幾千蚊落去，最終賺咗幾萬蚊，我使咗部分，一半拎嚟用，一半拎嚟炒股。

舊年投資環境麻麻，好難選股，主力揸大藍籌，好似中電控股（00002）同埋領展房產基金（00823），另外又有用過幾千蚊炒財技股，賺到個錢，起碼食飯都鬆手啲，炒呢類股主力要睇通告、股權分布，貨源乾唔乾等，舊年整體全年回報約40至50%。

倉位多元有利轉身

彩兒：你個倉係點擺o架？

劉：我會將五成資金放喺藍籌，三成放喺中型股，兩成放喺細價股，起碼可以「進可攻、退可守」，中港關係密切，香港上市股票以中資股為主，經濟係有周期性，我會放較多時間研究國策股同中型股，其中軍工股同醫療股都會留意多啲。另外，我身為行街精，個個星期都行街，都可以由生活入手，了解零售股；同埋我經常會參與戶外活動，同身處唔同行業嘅人傾偈，八吓行業消息，至於喺屋企時，就成日做宅女睇新聞，喺屋企邊拍拖邊研究股票！

仲有，我係炒熟唔炒生，愛股係中國交通建設（01800）同埋領展，近兩年內地經濟增長放緩，所以會用基建谷經濟，中交建除咗中國生意之外，仲有一帶一路國策幫手，所以我間中都會持有；領展就係我嘅生活化選股，佢主力做租務，業績Keep住交到貨。

乜「板」都睇攻零售TMT

冼：金利豐證券研究分析員冼燕婷（Yuki）

彩兒：你畢業後做過一年半財經記者，然後再做分析員，但係自己又冇乜做個人投資，聽落好似好離地咁喎。

甚少落場方便分析

冼：我大學讀新聞系，主修商業新聞，之後就做記者，擴闊咗視野，都學咗好多有用嘅投資知識。過往揀金融呢個範疇，覺得係一門專業，想挑戰自己，做分析員只係一年多啲，一路都好少做投資，因此自己角色會獨立啲，方便分析。

其實我唔算係數口精，但買嘢會格價囉。我依家每個板塊都會跟吓，其中零售同埋TMT（科技、媒體、通訊）就睇得較多，最少接觸就係資源股，因唔埋身，都想搵機會去煤礦視察吓。

Kitty：你上司係有財經界黎明之稱嘅金利豐證券研究部執行董事黃德几（Dickie），你使唔使學似佢咁唱得？

冼：其實Dickie作風好開放，會成日睇住同事嘅需要，佢成日叫女同事做姊妹，哈哈！其實分析員嘅工作平淡，最辛苦係……工作量唔少。公司同事好叻，可以搵到好多Deal番嚟，我就要做後勤工作，所以其實好多Report做，而且啲內容唔可以同外界講。出面啲朋友就成日以為我冇嘢做，其實工作時間係每日9.5小時，少OT嘅，多數可以準時完成工作，但係我做呢份工之後就肥咗，因Dickie會成日買下午茶畀我哋食，又會揸車車我哋出去食Lunch，都算係忙碌工作中嘅苦中一點甜。

金利豐冼燕婷看淡汽車股，稱相關股份已出現一輪升浪。（黃知樂攝）

冼燕婷（Yuki）小檔案

基建及鐵路撈得起

彩兒：呢一年，你有冇啲乜威水史？

冼：試過舊年有次玩選股擂台，揀咗敏華控股（01999），一個月內有雙位數升幅！

Kitty：咁你有冇心水貼士？

冼：要知道行業走勢向上定向下，邊隻個股會跑出，經濟數據就好重要。最應該睇好嘅係多公私營合作（PPP）項目嘅基建股或鐵路股，因中央多推PPP工程，中標消息愈來愈多，可鎖定未來收入，料今年經營環境唔錯；比較睇淡嘅股份係汽車股，舊年銷售數字太好，相關股份已出現一輪升浪，但今年換車頻率就會較少，會影響收入同銷售，可對今年盈利情況有負面影響。