絲絲講場：中環金融人又見魚翅撈飯

股市回復熱鬧，「魚翅撈飯」嘅日子又返來？港股自農曆新年假期後，成交顯著上升，尋日更突破一千億元，真係幾個月以嚟都未試過咁好景！股市氣氛一片歌舞昇平，尋日絲絲喺中環，見嗰度啲高級食肆人頭湧湧、座無虛席。

絲絲聽聞，股市交投暢旺，券商近排真係食豪咗，閒閒哋一餐飯請客食，3、4個人要兩三萬元埋單！券商仲話，兩三萬元係濕濕碎咁話，再豪啲都試過！大口氣到呢！

差不多要成「三皮嘢」嘅一餐飯食啲乜？靚紅酒、魚翅、黑松露等貴價菜式係指定動作，當然仲有包廳服務啦！

依家港股係咪真係「大時代」重臨，雖仍言之尚早，但睇嚟中環友「魚翅漱口」嘅日子已開始！

講開食飯，絲絲八到，今年中資證券行，好似冇搞年晚飯或者春茗喎。點解？原來近兩年內地禁酒宴，連累境外嘅中資機構都冇得食囉。

至於港股升市，證券行會唔會出現跳槽潮、加人工咁？券商就話，好多證券行四月先至出花紅，因此花紅未出，一般都唔會走住，除非挖角人工高好多就另計！

余絲韻