絲絲講場：有情人由「錢」入「心」

今個情人節閣下打算出個點嘅愛情價？嗱就畀個市價大家參考。美國全國零售聯會調查發現，消費者今年情人節「貼地」咗，預期使費平均136.57美元（折合約1,065港元），比去年嘅146.84美元，慳皮咗港幣80大元；慶祝情人節嘅人數，當地十年就跌咗10%，今年整體消費額預期較去年跌7.6%。至於香港，就睇閣下今年有幾出力。

講錢失感情？講心都要講金。要避免家庭、婚姻畀個「錢」字破壞，美國心理治療專家Michael NcNulty話，以下9點你要知。

1 【69%感情衝突，源於瑣碎問題】

一齊去旅行應使幾多錢？飯後邊個負責洗碗？呢類問題雖瑣碎，但長期重複就會出事。

2 【不同生活經驗所致】

出現瑣碎問題，源於二人婚前不同生活經驗。

3 【想解決，先學「講錢」】

要解決瑣碎問題，夫婦及情侶一開始要習慣一齊處理錢銀。

4 【錢總存在】

喺實際婚姻或感情生活中，錢總係存在，咪妄想避而不談。

5 【錢關乎信任】

如果喺錢方面唔能夠建立互信，其他更加唔使講。

6 【由互相坦白開始】

想避免「講錢傷感情」，要習慣坐低三口六面講清講楚，咪諗住單憑「坦白」一、兩次就算。

7 【傾啲咩？】

要向對方坦白交代嘅有三樣：自己嘅花費習慣、心目中嘅金錢哲學及長期財務目標。

8 【幾時傾？】

打算結婚先傾？太遲。其實喺互相認定雙方關係時，就需要互相了解財況，一齊作出安排。

9 【由「錢」出發】

成功嘅婚姻與感情關係，建立於互相坦誠及信任。由「錢」出發，先可發展出更深入嘅關係。

余絲韻