絲絲講場：財圈Android男難溝iPhone女？

外國約會網站Match.com最新調查顯示，單身嘅iPhone用戶有21倍傾向睇低Android用戶，而Android用戶睇低iPhone用戶傾向只得15倍。如果你用緊Android手機的話，你可以識到男仔/女仔嘅機會大減！

Apple股價今年累升14％

如果調查真係反映事實的話，就唔怪得Apple咁好賺，Apple股價今年已累升14%，前日收報131.53美元，離一年前高位唔夠1美元，仲差3美元就逼近歷史高位添！

香港財圈又點睇？一直用iPhone嘅富昌金融研究部總監譚朗蔚話，Apple始終係國際品牌，總好過啲雜嘜機。不過佢覺得iPhone對識女仔幫助唔大，最重要反而係心思，要不時帶另一半去特色餐廳搵美食咁話。不過，絲絲聽聞雖然譚太係用三星手機，但喺屋企亦不時會「霸住」老公部iPhone喎。

女財圈人又點？大華繼顯（香港）策略師李惠嫻一樣係用iPhone，緣於當初聽聞Android唔襟跌。佢冇「以電話取人」，佢自己當初拍拖時都係用普通手機。佢第一眼睇人，通常睇對方五官及儀容舉止，性格要長時間觀察嘛。咁佢先生呢？一樣都係用iPhone嘅。

用舊款機成功機會減半

咪話絲絲唔提你，調查仲話，若用緊較舊型號嘅手機，約會成功機會都會低56%；仲有，如果約會見對方手機屏幕裂，15%受訪者話未必有下次。仲有幾日到情人節，你諗你。

余絲韻