創業除咗要有好Idea之外，合作伙伴都好重要，諗住搵幾個志同道合嘅朋友拍住上，他朝有日搞間Apple或fb出嚟？勸你諗清楚，事關專家話，啲Tech Startup（創科公司）團隊本身係死黨兼且愛一齊蒲Pub，間公司通常都會鑊。
專門發掘與培育Tech Startup嘅英國企業顧問公司Entrepreneur First，佢哋提供種子資金同地方，仲會幫啲創業者互相配對營運Partner，然後賺番間公司嘅部分股權。
佢哋眼見過唔少失敗例子，最有資格咁講，佢哋話「做朋友夾未必等於可以一齊經營間公司！」佢哋一發現唔對路，就惟有派顧問介入建議重組團隊，費事一鑊熟咁話。
佢哋仲話近年見到個大轉變，以往創業大軍幾乎100%都係應屆畢業生，不過依家創業有年長化趨勢，畢業生創業比例已經大減至現時得番5%。
所以絲絲建議，追求友情無價嘅，睇勵志片好了。現實係，成功如Apple已故教主喬布斯與fb朱克伯格，早就同拍檔反晒面。
余絲韻