新世代供略：大學生「置」Like將軍澳

二手樓價高企，不少年輕上車客轉投居屋市場，希望可以尋找到心頭好。今期「新世代供略」主角是修讀工程學系的Wing，她鍾情將軍澳區配套優越，惟該區入場門檻高昂。若將貨就價的話，可考慮遠離坑口市中心的居屋康盛花園，保養不俗，自由市場叫價約400萬元起。

Wing表示，知道目前樓價高企，要上車並不容易。她指，「見到樓價一路咁升其實好灰心，買樓好似已經無望，但又唔想家人幫手畀首期，惟有自己努力儲錢。」

問到Wing的揀樓要求，她稱，「鍾意住新市鎮，因為社區設施較齊全。其實留守將軍澳亦係一個好選擇，不過居屋都可能要400萬元。其實可以上到車、有居屋住已經好好，唔想住得太過細。」

將軍澳樓價高企，要搵平盤不易，選擇居屋的話，較平之選可揀遠離市中心的康盛花園，因屋苑坐擁半山位置，出入隔涉，需駁一程車才到港鐵坑口或寶琳站，故樓價長期落後大市。

康盛花園屬私人機構參建居屋，樓齡約二十七年，保養尚算不俗，附近少高樓及建築物，自成一隅，近望山景，環境遠較市中心寧靜。

屋苑主要提供兩至三房戶型，開則較大，實用面積約400餘方呎起，部分兩房戶更可間成細三房戶，地方闊落好用，擺齊家電後還有一定的活動空間，適合大小家庭。

屋苑雖然遠離市中心，惟以居屋來說，配套相當優越，有游泳池、網球場及籃球場等康體設備。如要到港鐵坑口站及寶琳站一帶，則可乘巴士及小巴到達，車程十分鐘以內。