絲絲講場：金管筍貨！100蚊買到138張真金牛

好多寶，唔講你未必知。金管局位於中環IFC，佢哋55樓嘅金管局資訊中心，擁270度景觀，重點係免費入場，早已被中外網友發掘封為「香港隱藏景點」。已經傳開咗唔係秘密？唔該你行埋去入面個手信區，裏面仲有隱藏「彩蛋」，就係佢哋賣緊件內含13.8萬港元嘅紀念品。

想要碎鈔紙鎮講緣分

咁貴嘅紀念品？劏遊客？堂堂金管局又點會呢，呢件紀念品其實係個紙鎮，一個紙鎮要用138張碎鈔先整到，一個「金牛」（千元紙幣）紙鎮要用138張「金牛」，咪值成13.8萬囉！而每個都只係賣100蚊。

碎鈔唔係話有就有，仲要係全新鈔，張張真嘢，只不過係未能通過嚴格測試而冇發行出去嗰啲，要儲一段時間先夠做紙鎮，「金牛」數量又尤其少，所以「金牛」紙鎮經常缺貨。

講到紙鎮，可以話同「相架」、「水杯」齊名，組成「考驗友情」送禮三寶。不過依家新年又唔同講法，內含13.8萬港鈔嘅「金牛」紙鎮，又「138」又「金牛」仲兼係「新鈔」，收到夠晒好意頭。敢送嘅話，唔怕考慮埋做情人節禮物喎，係時候考驗吓你哋嘅愛係咪夠堅定。

余絲韻