絲絲講場：中資行開工利是兩隻金牛？

全港最大中資行中國銀行（香港）（02388），佢哋封兩條紅衫魚都算唔錯，據聞午飯當係同事開年飯，所以飯錢都有得Claim，比起「外國血統」滙豐銀行20蚊、星展銀行（香港）10蚊，中銀算闊綽啦！

中銀100周年有紀念鈔炒

滙豐話就話扎根香港150周年，不過同旗下恒生銀行（00011）吓吓都派20蚊。市場傳聞滙豐蝕錢嘅年份連開工利是都取消埋，得朱古力金幣一個，所以話「意思意思」有20蚊收大家都要心足。

如果「阿公」唔派得咁多，又不妨好似花旗銀行（香港）同中銀咁，老細親自巡分行同大家拜年。尋日中銀副董事長兼總裁岳毅喺中銀大廈主持新春團拜，今年中銀成立100周年，重頭戲當然係100周年紀念鈔，到時又有得炒，全港市民都有機會逗中銀封大利是啦！

余絲韻