恭喜發財！祝各位讀者雞年股場旗開得勝，一本萬利！猴去雞來，雞的特色是晨早鳴叫、食嘢啄啄吓、有翼但唔識飛、大雞唔食細米……依據呢啲特色，推測雞年股友要習慣「早起」搵食；炒嗰舊錢雞仔注啄吓啄吓唔好大貪；表面睇落有實力的大晒士股原來得個樣唔打得，選股要謹慎；還有創板和細價股整體表現可能不及往年，可轉攻中型股。
還記得猴年首個交易日筆者推介招金礦業（01818），結果股價最多翻一番，年終埋單都升近五成。要繼續揀一年一度的好股確實唔容易。今年國際金價會比較波動，現時未到沾手金礦股的最佳時候；中港兩地地產市場如果未有爆煲，銀行股都唔會太差，但亦唔會太好。睇來睇去，都係具內需概念的股份較可取，今日就講講隻青島啤酒（00168）。
青啤股價經歷一五年的大調整後，一六年基本上都在低位徘徊，直至去年末季開始略見起色。上月下旬更傳出其第二大股東朝日集團可能轉讓其手持青啤19.99%H股，並已委任投行處理。似乎近月股價回勇，事必有因。
老實講，論市盈率及增長前景，青啤估值未太吸引。不過，呢隻股已靜咗超過一年，若然有股權交易消息配合，短炒一轉又唔難。事實上，如今內地啤酒行業的市佔率已歸邊，併購機會已不如前，強強爭霸要講地區和營銷優勢。
青啤有的是老品牌和生產上的規模效益，如懂善用資源優勢開拓商機，博翻身不是沒機會。短線跟炒，初步上方阻力區在33至35元區域，回吐支持區在29至30元。
司慕渢