絲絲講場：甩走十大至Out財圈戰衣

睇睇你/你愛人衣櫃有冇以下10樣嘢，無論當年幾貴買、幾名牌，都係時候狠心講Bye，否則唔只衫Out，怕連個人都會被人Out埋。新年快換新衫。

1、【白領及法式袖口的恤衫】 即是電影《華爾街》（Wall Street）內米高德格拉斯穿嗰種，套戲八七年上，呢個金融才俊造型，係屬於80年代嘅。

2、【腰果花領帶】 呢樣係屬於意大利餐廳侍應嘅。

3、【吊帶】 都係嗰句，千萬唔好着到好似《華爾街》那樣，再講一次，嗰套係八七年嘅電影！

4、【印滿小圖案的絲領呔】 印滿小狗、小象、小企鵝、小魚、小CD、小跑車圖案嘅名貴絲領呔，確幾受政商界名人所愛，送人可以，自己戴就勸你咪。

5、【幼間條西裝】 呢樣當年確代表金融才俊。當年？講嘅係《華爾街狼人》（The Wolf of Wall）戲中嘅八七年，今年已經係一七年！仲有，斷估你唔係里奧勒度狄卡比奧。

6 、【牛熊袖口鈕】 入行時，父母親朋送嘅？多謝晒，唔該留喺屋企珍藏留念。

7、【條紋恤衫】 曾經係金融「浦精」嘅戰衣（或制服），但已經係千禧年代初嘅事。

8、【粗呔】 沒有最差只有更差。

9、【斜紋領呔（Repp Ties）】 呢啲係屬於大學或學會嘅，你早已畢業。

10、【Horsebit Loafer鞋】 踩住呢款前面有個馬銜扣（Horsebit）嘅Loafer（懶佬鞋），曾幾何時係金融才俊嘅身份象徵，不過一切已成往事。Move on吧！

余絲韻