特朗普總統椅都未坐暖，已簽行政指令廢除奧巴馬的遺產《跨太平洋戰略經濟夥伴關係協定》（TPP），股市似乎未識反應，港股更是一副放假大過天，提早收爐一樣。
昨日恒指現貨全日波幅只得79點，埋單收報22,949點，升51點，即市高低位22,986點及22,907點，都在周一的即市波幅之內。現貨成交疏落，好友大戶固然無興趣攻上23,100點樓上畀大家食胡，在美股同樣老僧入定，就連借勢做落的條件也暫時欠奉，會否在23,000點樓下悶到結算，睇嚟機會真係唔細。
今個月恒指低位21,883點，在本月首個交易日出現，高位暫時是上周錄得的23,151點，唔覺唔覺，在月初的挾淡之下，一月波幅有1,268點，雖然較十二月的1,588點為少，但同去年十一月的1,311點比較，相去不遠。
昨日提到特朗普勝選至今，恒指五次攻上23,000點後無功而還，阻力三番四次被確認，吊詭是臨長假前夕，低成交之下恒指又再步步進逼，對追破位的期指客無疑尷尬。然而，經歷上周抽上23,151點走勢陷阱，筆者決定食少多覺瞓，即使周五前期指大戶再攻，都一於唔跟。
John Mullen