絲絲講場：懶人基金出籠 你信箱有難！

被人爆？正確啲講，係被人「質」爆，尤其如果你係一個抱住「人望高處」宗旨經常轉工嘅人。

通知書每份30頁煩到暈

今次「元凶」係「懶人基金」，點解？話說如果閣下強積金戶口冇揀點投資，咁就會自動轉去俗稱「懶人基金」嘅預設投資策略（DIS）。「懶人基金」就快喺四月出爐，近排強積金受託人開始陸續寄出相關通知書。呢啲通知書好關懷你，份份中英對照，每份至少30幾頁，仲係按成員帳戶發出，換言之你有幾多個強積金戶口，就會收到幾多份通知書。

強積金推出咗十六年，十幾年轉三幾次工好正常，一個人有三幾個不同MPF帳戶唔出奇，嗱你一家做打工仔嘅仲未必只你一個，就係咁，你個信箱同一時間收到幾百頁文件……仲未計住隔籬左右嘅鄰居，屋企樓下成排信箱睇怕會幾蔚為奇觀。

個別打工仔有十個帳戶

BCT銀聯集團董事總經理及行政總裁劉嘉時尋日講到，舊年由其他強積金計劃整合去該行嘅帳戶中，17%擁有三個或以上帳戶，有人所整合嘅帳戶更多達八至十個。咁嘉時自己又有幾多個帳戶呢？只得一個咁大把。

仲記得積金局嘅真實個案，有人名下有成三十幾個強積金戶口，但望呢位仁兄個信箱夠大！絲絲幾咁希望呢位咁上進嘅仁兄不妨Send張佢信箱嘅壯觀相來同大家分享吓。

喂係時候，整合吓分散喺唔同強積金戶口嘅「婆乸數」，加加埋埋就變成一筆「大數」，亦方便自己日後管理。趁今日年廿八大掃除，整理吓好，財不入污門嘛。

余絲韻