絲絲講場：水晶球App測身家兼估埋樣

「魔鏡魔鏡，呢個世界上……」嗱魔鏡就冇，但有個水晶球測你夠唔夠錢過老，仲畀你睇埋你老咗嘅容貌點，敢唔敢試先？

話說Visa最新出咗個「財務水晶球」手機App，有新嘢，絲絲當然即時下載，同一班姊妹八卦吓邊個最襟老。大家爭住上載相片之際，發現個App仲會問退休年齡，同埋依家儲咗幾多退休金等等嘅財務資料，最終到底會係「美魔女」定「大媽」，原來好睇你係咪理財有道！

唔信？絲絲就搵代言Visa嘅韓星朴信惠（即係《繼承者們》女主角）嚟試，水晶球預測佢有為退休做好準備嘅話，去到70歲都仲係「防腐美女」，但如果退休金唔夠使，女神都隨時變婆婆，完全抵擋唔住歲月嘅摧殘（無謂畀大家睇啦）。所以話，識理財想點保養都得，就年年都25歲！

余絲韻