絲絲講場：股神上鏡自爆最錯投資
美國電視台HBO拍咗套紀錄片《Becoming Warren Buffett》，講股神巴菲特點鍊成，當然有佢親身出鏡受訪。巴菲特嘅生平故事好多文章以至自傳你都睇過晒？未必，今次紀錄片重點之一係講述較鮮為人知嘅家庭關係，仲講到為建立佢嘅商業王國，個人犧牲咗咩添。
紡織廠變旗艦巴郡
片入面又有Home Video（家庭錄影）同家庭相，咪好似翻開股神本私密家庭相簿咁！不過聽講巴菲特響鏡頭外自己認，寧願掀公司年報好過翻開自己本家庭相簿喎！
確實有啲嘢，佢唔多肯講。好似講到懷念亡父時（佢阿爸係共和黨員，做過美國國會眾議員），係好溫情，但就唔肯講佢兩父子最後一次對話講啲咩。
股神只係提到自己喺阿爸過身後幾日，作出咗佢投資生涯其中一個勁錯決定，就係買入當時仲係紡織廠嘅巴郡，可惜紡織業勁唔掂……巴郡依家已發展成瓣數多多嘅巨企兼係股神旗艦，原本嘅紡織業務早就關門大吉。
另一個關注點係巴菲特首任太太Susie，股神講咗好多有關Susie嘅深情片段，但至於四十幾歲時，點解Susie要離開佢，仲由奧馬哈搬到三藩市住？股神到今日仍含糊其辭，話「冇咩好講」喎。其實，二人雖然分居，但一直到Susie○四年去世時都冇離婚。至於巴菲特現任太太Astrid（艾絲翠‧孟克斯）？今次完全冇出鏡喎。
搞慈善全因首任太太
講到未來，86歲嘅巴菲特話自己唔怕死，仲好熱愛工作，話自己肉體已「貶值」得七七八八，依家好認真對待剩下嘅「殘餘價值」。佢近年咁落力搞慈善，有心有力。話時話，聽講「人權」與「慈善」係佢首任太太Susie教曉佢嘅。想睇？今個月三十日播，擔定櫈仔。
余絲韻