我要做財演：分析員反串散戶 考o靚仔估市

緊張氣氛籠罩整個會議廳，大家了解過整個活動流程後，同學Jimmy打頭陣，接受黃瑋傑提問。

Q1.年內個市點？
Jimmy：港股有反彈難長升
黃師傅請Jimmy預測今年市況。Jimmy稱，去年經歷過英國脫歐及特朗普勝出美國總統大選後，港股反彈，但升浪料不會持續，估計機構投資者即將沽貨獲利，令港股倒跌。至於長線走勢，就要再看技術分析。

黃師傅叫他估今年恒指高低位。Jimmy指，難準確預測，黑天鵝隨時再現，但撇除不明朗因素，恒指料在20,000至22,000點區間橫行。

Calvin：美匯有望突破103

輪到同學Calvin，黃師傅問今年投資焦點。Calvin指，焦點應為聯儲局加息步伐及特朗普政策吧！特朗普上場後，將擴大基建等財策開支，推動經濟發展，將令原材料價格上升。另石油輸出國組織（OPEC）落實減產，都利好油價，估油價會在每桶55美元上落。

黃師傅再問美匯指數目標水平。Calvin預計，美匯指數短線受壓，因聯儲局加息及特朗普上台兩項利好消息已充分反映，但長線有望突破103水平。

Q2.有咩潛力股？
Jonathan：滙控唔夠正 Buy騰訊

黃師傅問同學Jonathan今年看好的板塊。Jonathan稱：「擔心中國經濟放緩、環球市況波動，故較睇好舊經濟藍籌股，如內銀股，會穩陣啲。新經濟股方面，包括汽車、新能源及環保股等，之前熱炒過，今年可能有沽壓。」

對於有乜心水股份，Jonathan提到不少散戶熱愛的收息股滙豐控股（00005），反指其值博率低，「滙控股價跟唔貼市，所以佢唔受惠大升市。另預期美息續升，佢嘅息率會變得冇咁吸引。」

黃師傅再問：「若我得一注本錢，請幫我揀隻股。」Jonathan指，可選科網龍頭騰訊控股（00700），納指升，料其股價會受帶動，但選股仍要考慮個人風險承受能力及目標回報。

Q3.投資有技術？
Hugo：牛熊證易玩又唔貴

黃師傅問：「若想用衍生工具投資，應點入手？」同學Hugo回答指，不妨自學牛熊證，報章及電視都有入門教材，且買賣牛熊證入場門檻低。

黃師傅再考他：「牛熊證有收回機制，等於無仇報？」Hugo指，會接受遊戲規則，另投資有贏有輸，惟有按自己可承受風險投資。他續說：「睇準邊段時間少啲波幅，少啲市場消息嗰陣買入，被收回機會細啲。」

Candy：遇插水股小心部署

黃師傅問同學Candy，「若隻股由十蚊跌到落一蚊，值唔值得買？」Candy不建議，並比較個股與恒指的大跌浪，「恒指喺○七年由三萬幾樓上，跌到○八年一萬幾點，都只係跌逾六成。所以若某隻股跌九成，應唔關個市事，可能係間公司現金流或盈利能力出問題，隨時有清盤或財政危機。」

她續表示，若手持該股，投資本金又少，仍然可以坐貨博反彈；若金額多，應狠心沽貨離場，將剩餘資金另泊碼頭。她也不建議加碼溝貨，以免投資風險倍增。

「答散戶問題似睇街症」

聽畢同學回應，黃瑋傑稱讚眾人了解股市、商品以至個股價格走勢，大家充當財演，果真有板有眼！

他又分享財演的角色，「答散戶問題，就好似睇街症！多數散戶都有一個通病，係Shoot First，Aim Late！病咗先識求醫，打嚟就係要聽你嘅具體建議，所以最直接係，話佢知要斬倉、繼續揸、定係增持溝貨。」

他不忘點出幾個小貼士，「不要『Play By Audience』，唔係散戶想聽咩就講咩。」他着重教育意義，「我唔想成日捉魚畀佢哋食，而係想教佢哋點捉魚。」他要散戶從錯誤中學習，不再犯同樣錯誤。

對症下藥 忌遊花園

財演不時在媒體跟散戶交流，黃瑋傑指，財演針對某散戶的個案提供建議，其他散戶也能從中學習。他指，大多數散戶對股份基本分析未必感興趣，但此乃揀選潛力股份的必備技巧，他習慣回應散戶提問時，順帶一提行業前景及該公司在行內競爭力。

「財演既要專業，用充分理據支持見解，在談話中也要增加多啲趣味，加啲Gag都唔拘！」他提醒，可假設散戶未有基本金融知識，宜用簡單措詞，深入淺出，且切忌遊花園，時間寶貴，宜一語中的。