孖妹S檔案：中資行湧現 財子新出路？

曾：麒麟金融主席兼董事總經理 曾永堅

借助港優勢走出去

彩兒：我哋聽金融Friend講，一個九號牌（資產管理）RO，返工乜都唔使做，都印印腳穩袋六皮嘢底薪，有客底嗰班，閒閒哋都可以有八至九萬蚊月薪；仲有啊，最近有唔少啱啱升做RO嘅金融朋友跳槽，一跳人工就由三、四萬蚊勁升到五、六萬蚊……老實講，你半年前喺台資行無端端走咗去間中資行，仲升咗職，人工一定好吸引！

曾：舊年九號牌批出嘅數量勁升，當中好多都係中資行，事實上，一般中資行走出去投資嘅需求龐大，唔少中資公司藉住喺香港做資產管理作為投資窗口，主因睇準香港資金自由流動、法規同市場又成熟、稅制簡單、匯聚金融人才，而且市場覺得人民幣兌美元會逐步貶值，短線唔會停，所以令唔少揸人仔嘅投資者想通過香港，投資與美元掛鈎嘅產品，從而促使更多中資背景嘅行申請九號牌。

一帶一路推動發展

曾：人民幣距離全面國際化仲有一段路，喺未全面流通前，香港資金池、投資窗口仍有好大價值；內地一帶一路嘅國策，係重中之重嘅政策，東盟國家資金入中國發展，亦會帶動香港金融平台嘅發展機遇，相信未來5至10年，各方資金背景嘅金融機構會喺香港百花齊放。

我公司背後有中資股東策略聯盟──中軍金控，即係中國退休軍人財管服務，算係內地資產管理界嘅後起之秀；麒麟金融未來一年AUM（資產管理規模）目標係20億元人民幣。

人工高過港資兩成

Kitty：你唔夠朋友，唔肯講加幾多人工，一定要請食飯……

曾：我喺金融界廿年，以前行內人較鍾意歐資行，因整體福利好，個別人工係唔及得美資，但美資就最現實，貢獻一唔達標就要起身喇。

老實講，中資行福利係比港資行吸引，但就遜色過歐、美資行，不過中資公司係講長遠發展，冇咁目標為本，冇咁急於求成，中資行近年插旗，多數係講緊五至十年部署，現處蜜月期，冇咁快要自負盈虧。

曾：我依家管多咗嘢，加人工都好正常啦，哈哈！中資公司相比起港資，人工同分佣都好啲，整體人工平均會高15至20%，而且前線要交數嘅工種追得冇咁緊，出Bonus都會闊綽啲，分紅會係喺稅前盈利抽兩、三成出嚟派，半年或一年計一次數，就算唔賺錢，都會派番一至兩個月（人工）畀員工，增加歸屬感。

彩兒：「中資」總係畀人一種「大紅燈籠高高掛」嘅感覺，就快到農曆新年，公司門口會唔會掛番兩個大紅燈籠應吓節？公司平時又會唔會擺風水陣呢？不過，我同Kitty出入過咁多間投行，真係見過有中資公司門口平時係掛兩個巨型紅燈籠，有高管房入面仲會供奉神像添，唔知係咪會幫到投資手氣呢？

曾：無論中資定台資公司，點都會有風水、擺陣嘅慣例，只係取決於決策者呢方面喜好輕重，唔多唔少都會信嘅，我哋公司唔迷信，不過喺重要日子都會搵個吉日先做，至於改名嗰陣都有請教師傅意見。

未見虎媽文化管治

Kitty：內地好流行「虎爸虎媽」文化，中資行係咪管得好嚴？

曾：真係唔講，你都唔會知……好多人以為中資行會係以家長或軍訓式管治，好重階級觀念，其實唔係。

講呢啲，台資公司仲勁啊，因為台灣公司開會同寫報告嘅文化好受日式管治影響，中資行唔使寫咁多報告、工作流程簡化，授權管理同發展業績，唔使每事報告，總公司又唔會樣樣嘢都插手，自由度大好多，我可以擺多啲時間去發展公司業務，同內部員工溝通。

曾：雖然內地文化少不免係摸酒杯底先有偈傾，內地高管嚟開會點都要飲酒，呢十幾年都慣晒。不過，其實行內飲酒打關係嘅文化係淡化咗，二○○○年嗰陣，枱面一味只得白酒，近十年、八年就多咗啲紅酒，叫做養生咗喇，哈哈！

蔡：易易壹證券董事 蔡佑徽（高輝）

作風保守兼流程多

Kitty：你之前幾年就算跳槽，都Keep住游走於中資行之間喎，究竟點解早幾個月會轉番去港資行呢？

蔡：其實我都留意到有好多RO跳去中資公司，事實上，中資行資本雄厚，喺人工Offer方面出手係高啲，不過，中資行多數做法會保守啲，工作上多程序，多批核嘅流程，多規矩，做法會比較嚴啲囉。

港資熟悉業務易傾

蔡：我以前都係做過大型嘅國企公司，合規部就更嚴格喇，好多時做訪問都成問題，多數都唔會批。

有時做生意，例如做配售（Placing）咁，有時單嘢可能好急啦，需要喺短時間內完成，但即使性質係低風險、只係一般嘅Paper Work（文件申請）都好，中資行都會做得好保守，有時拖拖吓，最尾冇咗個生意機會。

蔡：內地資本好多時對本地人脈唔熟，港資行就當然在行好多，一旦有生意機會時就易傾好多，彈性大好多，即使港資行人工未必有咁高，但佣金、分紅分法就差唔多，做生意做得成嘅機會大咗，佣金就自然會賺多啲啦！

彩兒：中資行就梗係充滿中國色彩啦，老老實實喇，有冇乜着數嘢先？

蔡：我記得喺港股未加時（延長港股交易時間，一一年三月起首階段生效）之前，我做過某中資行，公司係有午睡時間，但加時後又點瞓吖？

批孖展態度較開放

蔡：另外，係啲中國傳統節日，員工會有禮物或利是收，啲利是會比港資行闊綽，我試過新年收一千蚊開工利是，港資行多數就只畀一、兩百蚊。

Kitty：內地A股投資者出名賭性強，但中資行踏實成咁，離地過堅尼地城囉……

蔡：又唔係嘅，好多香港資本會避開某啲股份，唔受人做孖展，但資金量相對大嘅中資行，對孖展批核上，就會持較開放態度，覺得啱做嘅就會做，冇咁多避忌。

彩兒 Kitty

money.biz@on.cc