Market Insight：春運概念股有運行

今年早過年，放完聖誕假無耐，貶眼經已年十八，仲有十多日又放假，都好難期望港股在成交愈玩愈縮的假期氣氛下，短期會有鑊氣沖天的場面出現。不過，本周「侵侵」正式宣誓就任美國總統，舊年十一月勝選後美國股市狂升，蜜月期會唔會宣告結束？基金開始計數離場，反而值得股民深思熟慮。

上周五道指微跌，但納指再創紀錄新高，新加坡的港股黑期升三十多點，預示今日有一個平穩開局。去年十一月大選後，美股升港股跌，主因是「侵侵」大興土木的經濟主張，市場解讀成美國通脹將因此復甦，掀動美息回升。香港處身息升及中國經濟走下坡的雙重威脅下，結果人升佢唔升，恒指仲要隊落21,488點的低位。

港股料重返上落市

基金同散戶唔同，唔可能等到最後一刻先轉身。睇美匯及美債息，上月中開始已扭轉大選後展開的趨勢，通脹及升息預期降溫，同聖誕及新年假期後，港股乾升返千五點上嚟不無關係。依家恒指差不多返回「侵侵」爆冷勝出的早上造出的23,048點高位，個市又再洗牌嚟過。古勝認為，延續番之前的上落市悶局機會最大。

地產股追落後首選

舊年十一月港府為樓市加辣，加埋利率預期逆轉，息口敏感的地產股跌得七個一皮。今日樓價指數證明實屬虛驚一場，反之地產股股價卻未復元氣，短期要搵落後股買非此莫屬，上周五美銀美林出報告唱好新地（00016）。

其實，以往辣招證明，懲罰性印花稅效果短暫，反而推晒內地買家及投資客為貪發展商補貼，唔諗二手湧晒去一手市場。所謂羊毛出自羊身上，發展商只係將呎價mark高再畀番甜頭，但買家仍會因為少少着數而感覺良好，所以上半年是值得睇番好地產股。

在堵塞走資愈演愈烈之下，內地閒資無出路只能焗炒，不過論入場先後，估計短期香港地產股會行得快啲，年中左右先輪到內房發力。

中航信似醞釀突破

仲有十幾日就過年，內地春運經已展開，唔少人啟程回鄉度歲，即意味陸空交通進入非常繁忙狀態。機場、鐵路及公路的使用量上升，相關企業應有受惠，呢啲股份又有冇機會炒番轉，發個新年財呢？不如先睇睇近期各板塊表現！

去年首十一個月，北京首都機場（00694）飛機起降架次及旅客輸送量分別按年增長2.7%及4.7%，表現不過不失。不過，股價舊年八月高見9.79元後持續回落，間中雖有反彈，惟弱勢未改，現時難言已經見底。

至於為機場、航空公司提供系統的中國民航信息（00696），幾乎獨佔內地市場，早前有大行估計其市佔率達95.5%。

內地旅遊業蓬勃，而系統需要與時並進，不斷提升，集團食正條水。該股月初突破下降軌阻力後，守多條平均線之上，正醞釀突破100日線16.8元，可待破位後再跟進。

廣深鐵有混改憧憬

春運期間車站例必人頭湧湧，廣深鐵路（00525）股價舊年十二月開始攀升，至今升咗近一蚊。回顧集團舊年首三季度，按年多賺逾23%，內地鐵路網不斷拓展，加上混改概念，有機會帶動股價進一步向上。

古勝