絲絲講場：星展借《星戰》喻經濟

話說星展近排發表一七年中港市場策略報告，撰寫報告嘅星展唯高達中國及香港市場策略師李灝澐（Alexander）一開場就Say Sorry，話遲咗出報告，事關早排《星球大戰》中飾演莉亞公主嘅女星Carrie Fisher（嘉莉菲莎）過身，佢掛住煲晒咁多集《星戰》嚟緬懷阿公主。

不過就畀佢諗到用6句《星戰》經典金句來講今年個市。事不宜遲，去片！

1.Obi-Wan（即是天行者師傅）：「我感覺到原力受好大干擾，好似數以百萬計嘅人同時因為恐慌尖叫，然後，突然靜晒」。

一聽就知係特朗普當選美國總統搞到市場一地眼鏡碎啦！Alex話，今年可能見到有疑歐政黨喺歐洲主要大選中勝出，引發類似震撼，萬一市場因此憂慮歐元體系嘅前景，就準備人仔跌多啲！

2.黑武士（Darth Vader）︰「拍我啦，我哋父子檔統治成個銀河系。」

Alex話呢句諗起特朗普，佢當選總統後帶屋企人見外國領袖惹批評（大女伊凡卡舊年十一月中陪老竇見日本首相安倍晉三）。Alex話，特朗普嘅「再通脹」政策以及中美關係轉變，對港股尤其關鍵。

3.天行者（Luke Skywalker）︰「佢內裏有良善，我感受到。」

又係講特朗普。Alex話特朗普都差唔晒嘅，話唔定佢啲政策明朗化後可以消除市場憂慮呢。

4.天行者︰「1萬？我自己買隻船都得啦！」

話說有次天行者上「千歲鷹號」，鬧船長漢蘇奴（Han Solo）開天索價。Alex預期，現實世界中嘅美國，工資隨住勞動參與率接近完全復甦水平而上漲，聯儲局會比以前更「鷹派」，買銀行股好過買負債偏高嘅公司。

5.黑武士︰「呢個原力勁。」

講緊嘅係美金，預期美元今年繼續強，不利香港與澳門作為旅客目的地嘅競爭力。

6.Obi-Wan︰「願原力與你常在。」

以呢句作結，Alex話希望佢份報告可以幫到你！想知係乜？睇B3啦！

余絲韻