孖妹S檔案：2017大中小戶鬥攻略

致富證券觀塘分行助理經理 唐煒鵬（Tony）

恒指年中望上24000

唐：舊年全年大市都冇乜大郁動，去到最後波幅升得唔算多，希望今年港股可承住深港通加大番啲成交額，因為成交淡，搞到散戶炒賣氣氛好弱，又唔敢亂咁出貨入貨，希望美國候任總統特朗普之前講嘅政綱會言出必行，咁起碼即使美國加息都好，都仲有基建、金融同電訊股炒！

中移聯通有機跑出

唐：我估計，今年聯儲局主席耶倫會繼續玩狼來了遊戲，只係出口術唱加息，所以大市都會炒上落為主。我諗今年個市會好啲，年中恒指挑戰番舊年約24,000點高位，希望舊經濟股出到新股王，因應使用量增加，同埋鐵塔效應，中國移動（00941）、中國聯通（00762）等會跑出。

孖妹：會唔會開口中，中移做一七年股王！

晉裕環球資產管理投資研究部總監 林偉雄（Andy）

港股W形反覆上升

林：一六年好難做，太多黑天鵝，食「燒鵝」都食到滯咗，投資組合回報唔理想，只有單位數字升幅，希望今年唔好咁亂！以舊年經驗，若喺脫歐同美國大選前已懶醒咁跟民調做嘢，係會輸死人，所以今年有啲大事件嘅時間，奉勸投資者一日結果未出，都唔好做嘢。我預計，今年港股大市會呈W形走勢，反覆上升。

基建新能源有錢景

林：今年希望特朗普同耶倫會乖乖哋，管理好市場預期，耶倫本身口風話舊年會加幾次息，點知埋單就只加一次，搞到債市好Chok，亦打亂投資者部署！我相信全球會減少幣策，增加使用財策，我睇好基建股。另《巴黎協議》後，各國致力減排，呢條路唔會返轉頭，睇好新能源股。

孖妹：唔好勞氣，睇嚟第日都係唔好同你食中菜，費事刺激到你。

御峰理財高級投資組合經理 香敏華（Tramy）

美股估值貴難大漲

香：睇嚟今年成個世界都會比較亂，有啲人話亂局會有多啲投資機會，但我自己傾向想世界和平多啲，香港人團結啲，大市走勢唔好太波動。雖然美股接連創新高，但未來都要睇企業盈利係咪會有理想復甦，如果唔係，我都會覺得美股估值偏貴，唔會再有大升空間。

審慎至上 現金為王

香：個人投資方面，我二○一六年靠新興市場股票基金賺得比較多，回報有雙位數字，希望嚟緊呢年可以Keep住上，但投資策略會傾向審慎，會趁大市回調較深先入市，平時投資組合會持有五成以上現金。

孖妹：齋睇美股係咁飆，真係「好葡萄」囉。

散戶 禤先生

市恐飄忽 見黑天鵝

禤：我睇怕今年金融市場都係飄忽，太多不明朗因素，特朗普即將上場做總統，佢主要政綱係搞基建同減稅，本身係好，但又搞到中美貿易戰一觸即發，所以佢對美國影響都係好壞參半，歐洲又政經動盪，我估今年都唔會係平穩，應該會有好多意想唔到嘅事。

騰訊獨大 睇高一線

禤：我最想係美元唔好再強落去，再升值，通脹就太勁，又要加息，加咁多對其他國家唔係好事；人民幣都唔好再貶值落去，雖利出口，但會打擊國外投資信心，對中港股市唔係好事。今年我心水股係科網股，新經濟股仍強，騰訊控股（00700）獨大，競爭對手少，較睇好佢。我投資組合係99%藍籌股，上年成績係跑贏通脹，算合格，希望今年繼續，可有5至10%增長。

孖妹：睇嚟個個都怕咗侵侵（特朗普姓氏英文諧音）喎。

何友加投資頻道Blogger 何友加（Yauka）

捐窿捐罅搵爆升股

何：我覺得喺二○一六年，實在睇住太多身邊嘅股友亂聽財演、同一啲財經群組嘅貼士亂咁投資，唔少人因為咁輸車、輸樓，真心希望呢班朋友今年可以脫苦海啦，而我個人投資策略一向都係捐窿捐罅，用盡方法尋覓爆升股，舊年投資回報有2.3倍，今年會再勤力一啲，希望今年回報會有5倍，亦會喺博客分享更多股份分析，希望大家今年齊齊生活得好啲！

資源股牛二有得諗

何：我對今年股市係樂觀，美元唔會強一世，好快會見頂，中美都需要資源，亦同時控制供應，相信資源股已進入牛市二期，現時個人重注資源股，上半年主力一手揸煤、一手揸鐵啦，哈哈！

孖妹：嘩，我哋都想生活好過啲啊，希望今年各股友都手氣順啦。

中原資產管理高級副總裁 黃安盈（Kristy）

今年或難玩過去年

黃：其實一七年個市，我真係睇得好灰。你問我新年願望，我都唔知點答你，希望今年唔好一盤亂局，大市唔好咁Chok，平平安安就好。但我相信今年會比舊年難玩，投資策略上都會保守啲，以持有高比例現金為主。

只吼藍籌 拒掂股仔

黃：以往都有可能揀啱股，乖乖持股半年就會有唔錯嘅回報，但今年就冇呢支歌仔唱，要Trade多啲，密密賺餅碎。

呢兩年都係動盪市，我計劃吼幾個月低位先去掃貨，只會掃大藍籌，Chok市玩股仔唔掂檔。我一向重視個人投資回報多過升職加人工，希望今年投資目標回報有雙位數字。

孖妹：你咁勤力睇市，咪少咗好多時間扮靚？

復星資本執行總經理 葉浩文（Kirk）

吼實新興市場基金

葉：我舊年年尾轉新工，希望事業上有新突破，個人體能方面都想操得更Fit，想今年完成半馬同全馬賽事，仲會打番場泰拳拳賽添。

大市交投料明顯轉強

葉：喺個人投資方面，我會睇好港股，希望佢做好啲，隨住深港通開通，預期今年港股交投會明顯轉強，資金有機會流入港股，尋找資金流動性及財務實力增長力強嘅公司，另外，俄羅斯、印度、巴西及東南亞等新興市場前景唔錯，我都會吼實相關基金。

孖妹：年尾太多Party，食到滯晒，睇嚟要跟你操拳Keep Fit喇，唔係點繼續精靈地為大家發掘股市至八卦嘅趣聞？

時代金融集團董事 吳捷鐘（Eddie）

Set好止賺同止蝕位

吳：今年匯市有好多不明朗因素，有反覆係必然，非常考心理質素，好睇你把唔把持得住，最緊要係設止賺同止蝕位，以免贏粒糖、輸間廠。美元喺特朗普上場後會否繼續呈強，美國經濟白熱化，又會否出現回調？呢啲係變數。

一月底前宜買外幣

吳：好多人希望特朗普上場後，美元一路強落去，令其他貨幣跌，咁就可以到歐洲或其他國家旅行，我覺得冇大家諗得咁理想，美元喺高位有機會喘息，到年中打後炒加息期，預計年底前可加一至兩次，到時美元再強番，所以一月底前係買外幣時機，買吓加元、澳元，希望美元回調嘅話，澳元兌美元可試番0.70呢啲大位，然後上番0.78，有約10%升幅；美元兌加元就可1.36樓上買，預計油價今年有機會挑戰60美元水平，加元會有5至10%升幅。日圓兌美元年頭就會試110，年底會去番130。

孖妹：希望炒吓外幣換番程歐遊旅費啦！

Kitty、彩兒