北水頭等倉：中芯靜候上車機會
新年首個交易日，祝各位投資者在股場旗開得勝，投資豐收！去年國企指數低位在7,499點，高位在10,210點，高低波幅有36%。筆者估計今年國指的波幅不會少於去年，換言之捉得正入市點，一樣可以過豐收年。
美國候任總統特朗普到底有幾喪，係投資者最擔心的問題，其伎倆不外乎是藉減稅召集美企回美國投資、搞貿易戰、斷中國財路、挑起南海爭端等等，到底呢個商人如意算盤打唔打得響，仲要等着瞧。
不過，照計中國唔會坐着等捱打，即使係非常時期要行回老路、人民幣國際化、金融市場開放進度要停一停，都唔會世界末日，靠十三億人口內需，以及「一帶一路」策略，都應該可以應付一定時間。一旦喪普賭輸，美國人夢醒，經濟頹勢再現，全球資金有機會又來一次大轉移。總而言之，呢一刻唔好自亂陣腳，第一季有機會出一個低點，最快在第二季，資金有望重新流入新興市場，且耐心等候出擊時機。
電訊股穩陣之選
股類方面，正正由於維穩經濟要靠內需，一些主要經營內地市場的內需股，是較為穩陣的選擇。
就以三大中資電訊股為例，息率都有兩厘樓上，其中以中國移動（00941）基礎較為穩定，股價又經已回落至接近去年初低位，首季是留意入市點的好時候。
另一隻可以留意的係中芯國際（00981），打從大唐電信科技產業控股、國家集成電路產業及紫光集團成為公司三大股東之後，呢隻股經已脫胎換骨，加上去年經港股通的北水狂吸之後，相信貨源已歸邊，往後鍾意點挾都得。
睇上月下旬股價由10元邊抽到上除夕前高位見12.28元，可以進一步推斷內地基金坐重貨。首季回吐在10至11元唔怕上車，博三月結又再挾上高位結算，9元關為重要支持，不容有失。
司慕渢