Market Insight：騰訊趁首季執平貨

新股市場日漸變質

每逢年頭年尾都係計數的時候，上月初已先後有會計師樓話香港去年又再蟬聯全球新股市場集資王寶座，冷不防上周又傳來紐約可能以微弱優勢超過香港，奪回去年全球最大IPO市場之位。

老實講，到底邊個先至係全球IPO市場集資王，對散戶嚟講真係冇咩大意義。點解咁講？單睇去年經全港最大過戶處中央證券所處理的新股共37宗，有關新股全年認購的人數只有14.8萬人，按年勁跌逾七成，認購人數更是近四年最低。

出現呢個現象，皆因雖然去年香港IPO集資總額係保得住，但不少係國企左袋入右袋認購的中企，招股價一步到位，掛牌後就潛水。再唔係就係上市前經已圍晒飛的創業板新股，股價離地到嚇壞人，散戶得個睇字！諸如此類的新股市場現象，幫唔到散戶投資賺錢唔在講，更造就一批妖股當道，影響香港市場形象。

所以話，啲財金官員實在不應再以IPO市場集資額高低而自滿，反而應認真檢討香港新股市場集資功能係咪正在褪色。

藍籌未改上落格局

成年流流長，一七年股市點樣走？睇得掂首兩季都經已拍手掌。古勝認為，上半年表現未必如大家想像般可怕，而第二季表現又會較第一季有改善。集中講藍籌股，美息既已重拾上升軌道，但今年係咪加息三次，就要聽住先。

香港樓市已一定程度消化息口因素，即係預咗今年港息點都跟加一次，但係喺班內地民企嚟掃地皮之下，托住麵粉價，磚頭價實難大跌。咁睇落藍籌股會呈上落格局居多，建議中性。

港交所伺機炒一轉

藍籌金融股方面，去年末季確有資金流入銀行股，展望今年上半年，區內資產價格泡沫將持續的大前提之下，龍頭銀行股仍有捧場客，內銀如建設銀行（00939）及工商銀行（01398），息率都係咁上吓，揀大笨象（00005）就不如簡單啲揀恒生銀行（00011）。

至於港交所（00388），食粥食飯都係睇互聯互通同A股表現，上半年策略係博首季兩地市場調整，次季反彈，首季可以留意吓港交所喺低位的表現，博深港通點都會認真啲炒一轉。

主打內地值得捧場

騰訊控股（00700）去年股價上過二百蚊，之後進行調整，收爐價189.7元，全年升24%。在下對於QQ表現仍具信心，因為同阿里巴巴已全球化發展，兼喺美國上市唔同，騰訊主要市場都喺內地，且又係港股的重磅股，無論站喺阿爺要維穩港股，又或者內地新興產業將喺國策持續護蔭下蓬勃發展來睇，QQ都唔會無運行。

即使「侵侵」今年要挑起事端，揭開中美貿易戰，對QQ的中短期發展影響並不大。反而可留意國策如何支持互聯網金融發展，以及推動傳統電訊與互聯網產業進行戰略合作，起到的協同效益有多大。得出的結論係，今年繼續捧QQ場，如果冇貨喺手，不妨留意第一季有冇平貨買。

古勝