財演要搶內地客，當然要施展渾身解數，同學Joycelin和Stephen對當中竅門分外好奇。
Joycelin：中資行及外資行接待內地客有何優劣之分？
黃志陽：外資行會度身訂造投資組合畀客戶，產品設計會較中資行完善。不過，中資行所收取佣金更便宜及提供更貼心服務，做高頻交易嘅客戶對佣金特別敏感，所以中資行佣金較具彈性。因為跑嘅數會比外資行少，可以花更多時間同客戶打好關係，唔使時時刻刻都諗住點Sell單。
Stephen：啲客會唔會將錢分開擺喺唔同證券行做投資？
黃志陽：我甚少查問客戶有冇在港設立多個投資戶口，深信用時間及成績證明自己實力，客人自然會將更多資金調入我哋戶口。
Joycelin：你哋工作有幾辛酸？
黃志陽：以前試過凌晨1、2點仲要同佢哋傾長途，唔知點解內地人唔使瞓覺。其實湊內地客比湊香港客輕鬆，最擔心係怕內地客用孖展投資失利而走數，然後銷聲匿迹，因內地客投資較進取，會將大部分可動用資產投資，所以一旦被追繳保證金，慣常會被斬倉。
Stephen：跟上海、北京及台灣客相處，係咪需要不同湊客技巧？上海人有權威啲？北京人稱兄道弟啲？台灣人就似朋友多啲？
黃志陽：上海人數口精，北京人比較豪爽，台灣人就有主見多啲，對個市比較熟悉。