我要做財演：經紀Serve大媽 要講心又講金

開源：搵優質客靠搭上搭

要賺北水，第一個問題當然是如何搵到一批又一批的內地富戶。黃志陽稱，通常透過現有客戶或朋友認識內地投資者，「咁樣易啲搵到優質客，亦大約估到佢屬於咩類型嘅客。市儈啲講，知佢有冇錢。」另一個途徑當然是在內地舉辦投資者講座，他指，「一般十個觀眾入面有一個，會喺講座之後，自己主動搵上門，叫你幫佢開戶口投資，但係呢啲客冇咩保證，咩客都有！」

辦公室位置影響印象

講到入場門檻，黃志陽指，「我們做零售生意，來者不拒，只要個客開到張一萬蚊嘅支票，我哋都會收，但前提係，佢唔好蠱惑就得。」他又指：「公司嘅地理位置、辦公室大樓外貌等都好重要，會影響佢哋對公司嘅觀感及信任！」

簽單：辦事能力高最煞食

成功接觸客戶外，下一步當然是要說服客戶簽單，這個步驟少點交際手腕也不行。黃志陽說到戲肉，「內地客好講個信字！」內地客最欣賞香港人有高的辦事能力，普通話水平反而不太重要，「只要做齊晒答應佢嘅嘢，佢就會滿意。佢哋亦都好睇你嘅服務質素，包括你對工作嘅認真程度，同埋佢過嚟香港旅遊時，你嘅熱情款待等。」

貼心服務，又怎少得到機場接送、預訂酒店等，但黃志陽竟說不用這樣做，「呢啲唔係好需要，招呼高端客，我哋都係帶佢食中菜，佢哋最鍾意食翅。」內地人喜歡喝酒，他指，用普通白酒招呼即可，不用出動五粮液等貴價酒。

陳年威水史留心聽

他也提醒，要在飯局中予人好印象，「最緊要肯聽佢哋講陳年英雄史！」他提到，要在談笑風生之中把單簽成，可謂十分有技巧，並笑指簽單與耍易筋經都有共通點，就是「唔急得！」

箍客：致電匯報展現熱誠

他詳述，內地客歡迎每天致電向他匯報大市行情或投資回報等，表現出你對工作的熱誠及對他的重視，「你日日煩佢，佢好開心！」他指，他們會密切留意客戶所投資公司的動向，必定會即時報告重要資訊。

諗計幫撞板客 加分

他更分享，「內地客好少講定你要幫佢賺幾多，佢哋好明白投資涉及風險，所以喺香港開戶，純粹係想資產增值及分散投資風險。」他不諱言，「有散戶曾提出，只要我幫佢賺到一百萬，多出嚟嘅就屬於我！不過咁樣唔啱規矩。」

「顧客永遠是對的」也適用於湊內地客。「我只係佢軍師，畀客觀建議同提醒佢有咩投資風險，最終決定點投資都係個客自己選擇。」他稱，「同理心好緊要，唔好因個客唔跟你支笛投資，最後撞板，你就剩係識講I told you！咁好唔啱，要有建設性咁幫個客諗辦法。」