長假期前夕，港股的成交持續低迷，好明顯，班大戶於聯儲局議息的結果出爐之後已經去晒放假。交投不活躍，市場上自然不會有太多值博的異動股。
唔怕話畀大家聽：自恒指於上個星期確認於23,000點的關口久攻不破之後，我便大幅減持了正股的倉位到依家。就連每日同我於WhatsApp群組內出生入死的粉絲都知道，我食足成個星期花生！
其實我真係諗唔到寫乜嘢，所以先會到依家先入正題啫！動筆前有位記者打電話來問我：大市會否於下個星期趁低成交下挾淡倉，上返22,000點做年結喎？
我覺得這個問題相當有意思，係，我們確實需要防範大市於低成交、低參與的情況下，舞上舞落都一樣容易。因此，我不排除恒指於剩餘的幾個交易日內一下子衝返去上月的低位22,000點邊做後抽，然之後先萬劫不復。
不過，挾上都總要找一個像樣的藉口吧？到目前為止，我真是一個都找不到，弱市下，個個趁反彈出貨是常識。我讓你上到22,000點都只不過是400點不到的空間，向下是幾多呢？21,450點是250日牛熊分界線，亦都是六月時候的阻力變支持。不過，我重申，當大戶於年初返回晒自己的崗位之後，21,450點便不會是甚麼支持喇！
所以，我建議粉絲們於低成交期間好好養精蓄銳，如遇到反彈的時候就沽貨，到明年喇，咪可以實力做淡一些未跌的藍籌股，博恒指落一、兩千點囉！
富昌金融研究部總監 譚朗蔚（作者為註冊持牌人士）