Market Insight：港股不明朗因素多

若以九月九日高位計，港股累積跌了2,728點或11.4%，相比之下，華爾街三大指數之一，道指同期卻累升10.3%。「侵侵」爆冷勝出，環球股市不單止無出現閃崩，華爾街班友個個趕去配過副眼鏡之下，統統認錯兼轉軚，押注「特朗普經濟學」能夠帶領美國經濟加快復甦，全球熱錢瞬間來個百鳥歸巢，股市蜜月期會唔會去到佢明年一月二十日宣誓入主白官嗰一刻？

憂美股蜜月期完結

「炒預期、沽事實」一向係金科玉律，買股票唔好博最後一浸，玩開美股，踏入明年一月中多多少少都適宜減減磅。考起的反而係，同美股背馳的港股，睇唔到有扭轉乾坤的能力，萬一美股下個月真係轉勢，衰起上嚟拖埋港股一齊冧的話，咁就真係大鑊！

新舊經濟股都不濟

大笨象滙豐控股（00005）回購計劃暫告一段落，港股連最後的定海神針都無埋，面對中港股票基金贖回潮，都真係唔講得笑！跨國大孖沙撤退得，從來唔會一時三刻食回頭草。

內地GDP預測太樂觀

內地熱點城市樓市調控啱啱開波，過去兩個月樓價已癲唔起，在可見日子，由物業銷售、建屋供應鏈、以至樓價上升，業主財富效應減退對消費市場的影響，所產生的漣漪作用可大可小。

「侵侵」明年上場，已磨拳擦掌在貿易壁壘攪局。內地官方估明年GDP增長6.5%，照睇形勢實在樂觀得滯。就算避舊經濟捧新經濟，單係下半年，內地大幅削減光伏及風電上網電價，到近排準備重罰騙補的新能源車企，捧場客無不雞毛鴨血，難怪魚缸揚言斬手指戒股者眾，即使心口掛住勇字，如此市況下，揀得落手是少之又少。

人仔貶值中資閉翳

中資財團近年積極進入香港的物業市場，且出手闊綽。海航集團兩個月之內，以大約142億元掃咗兩幅啟德地皮，呎價分別達13,500元同13,600元，創東九新高。塊地已經咁貴，加埋建築成本，至少賣兩萬幾先打和，講到尾係內地着手抑制樓市泡沫，令不少內房相關企業將目光轉至香港甚至係海外。

海航進取搶高樓價

海航周三再以近6億元入主珠寶股KTL（00442），帶動該股昨日復牌後升逾兩成。海航在港另持有三間上市公司，包括香港國際建投（00687）、海航實業（00521）以及航基股份（00357），昨日前兩者均做好，分別升6%及3.7%。此外，早前有傳其持有逾三成股權的香港快運，明年亦會喺主板上市。

人仔貶值引發內地走資潮，一般市民就嚟香港買樓保值，險資都想嚟買港股，可惜就畀阿爺煞停，財團就大包圍，買地買樓買商廈買股票，相信類似的大宗交易陸續有來。

古勝