港商搞網域 年搵過千萬
「8」和「3」，會否是通域存網（UDomain）創辦人及行政總裁章濤的幸運數字？UDomain是章濤的第三次創業，現已成功營運18年，年生意額達八位數字（逾千萬元），甚至他早前因賣出「8383.com」網站域名而大賺。當然，撇除運氣，他更深信創業是要做你相信嘅嘢、做你鍾意嘅嘢，然後不斷堅持。
成立於九八年的香港公司UDomain，是大中華區知名的域名及雲端方案供應商，為客戶提供網頁寄存、雲端方案、互聯網設備管理等互聯網服務。章濤形容：「我們猶如貨倉，寄存、管理客戶網站。」大家樂集團（00341）、港鐵公司（00066）、消費者委員會等都是其客戶，以至過去一些大型的演唱會、樂壇頒獎禮的串流服務，公司也有份。
談到當年創業，章濤憶述過程有點轉折。「我大學時讀金融，畢業後做了4個月版權銷售，但當時有趣的是從來沒有人管我、教我點做，成件事好似我自己做緊生意。這令我思考何不真的自己做生意？」
曾被抄橋 賺錢變欠債
他指：「第一次做玩具生意時，我覺得自己好成功，好景時，一個月賺幾十萬咁多，當時我只有23歲！當然亦好快失敗，做了半年畀人抄橋，於是由賺幾十萬變成欠人幾十萬。」
首次創業失敗後，他重新打工，轉做電腦銷售，亦是他真正接觸科技和網絡知識的時候：「當時老闆好嚴格，每朝都捽數，又要每周考試，考銷售技巧和電腦知識。我考試好好，不過賣唔到單，所以我有一個『研究生』的花名。」他笑言。
打工幾個月後，他與拍檔們發掘到把硬件由香港賣往內地的商機，就決定再出來創業，儘管當年九七確有市場，但很快他們的生意又因欠缺關係網絡而急跌，才領悟到做生意不是自己原先所想這樣簡單。
被動收入商機闖出頭
痛定思痛，章濤歸納出要做有「被動收入」的生意：「有甚麼是我瞓了，都有錢收？就是建立一個基礎後，收入會慢慢積少成多的商業模式。UDomain的創立亦是建基於此：坊間網站愈來愈多，但不保證有生意，但有冇生意都好，公司都要付寄存網站的錢，這是一個有持續現金流的行業。」
結果，他由最初借10萬元三度創業，一開始忙到「喺公司瞓咁滯」，到現在UDomain成立達18年，公司年銷售額仍能保持至少雙位數字增長。
「若年輕人有創業想法，應趁早去做，因做生意難免會經歷失敗。倘年紀大了才創業，未必能承受得起失敗的風險。最重要還是要做自己喜歡和擅長的事，堅持下去，不隨波逐流。若你做的生意冇乜回報，但你仍好高興返工，我深信你總會有成功的一日。」
熱愛這行的章濤，更分享自己身體力行投資域名的經歷：「九九年時搜索過哪些數字相關域名既靚又未有人登記，數量不多，唯一找到『8383.com』看似不錯，就用幾十元買了。買完擺喺度好耐都唔知做乜，突然今年初有內地公司感興趣，就以61萬元人民幣賣了。」