絲絲講場：道指快破兩萬唔開Party

仲記得美國道瓊斯工業平均指數（俗稱道指）喺九九年破一萬點時，紐交所預備咗批印住「Dow 10000」嘅Cap帽畀啲交易員（見上圖），齊齊喺交易所內拋帽，當時紐約市市長朱利安尼同紐交所主席格拉索都戴住頂帽，興奮到開P咁。依家道指就快破兩萬點關，帽呢？聽講官方會整些少「Dow 20000」帽咁，但就唔會大搞慶祝。乜反應咁冷淡？Hey，今時唔同往日，當年道指破萬後科網股爆，又整場金融海嘯，道指由當年一萬點行到依家，呢十七年來唔少投資者都學（/領）咗唔少嘢，加埋依家啲人炒股多數用電腦，唔使靠交易員，場內交易員當年有幾千人，今日一千人都無，乜都唔同晒喇。