絲絲講場：湯文亮教你買樓慳稅

話說湯文亮近日朝早跑步去茶餐廳食水煮麥皮，有對男女朋友向佢求教。佢哋準備聯名買層800萬元連一個車位嘅單位，不過男方早有物業，要再買就要畀足15%印花稅，問阿湯有冇計仔可以畀少啲。

佢就梗有計。佢話首先，要求業主將物業拆契，分開住宅同車位成交價：600萬元住宅、200萬元車位，然後就男方買車位、女方買住宅。咁樣女方只須畀首次印花稅不多於4.25%，男方只係畀車位印花稅，咁可以慳咗大約80萬元左右。絲絲聽落，只要係以市價拆契，稅局應該唔會追究，咁就行得通。

湯文亮尋日仲提到，原來佢秘書都同樣向佢請教過，阿湯當然都有傳授兩招。對於樓市仲有大量高價湧現，佢話唔係驚唔驚嘅問題，要買樓就要畀錢，買家借貸比例唔高，業主唔會輕易賣樓，放盤少咗，樓價無得落，佢仲估計農曆新年會有小陽春喎。

余絲韻