絲絲講場：小加憑歌寄意堅持發夢
香港交易所（00388）行政總裁李小加發表年結網誌，借用咗內地搖滾老鬼崔健當年句經典歌詞「不是我不明白，（只是）這世界變化（太）快」！
小加總裁借呢句歌詞形容今年「意外」實在太多，又話雖然世界變得撕裂同難測，但佢話冇絕望，揚言「夢還是要做的！」
夢想狂食M記雞翼
佢仲好感性，講番自己以前啲小心願連叫「夢想」都講唔上，直頭係「癡心妄想」。好似佢當年做石油工人時，行過廣州中山大學門外，幾想自己有日都可以讀大學；後來去到美國讀書，幾想可以隨便行入麥當勞食雞翼，唔使計住荷包……
講咁多，佢無非係想話，當日大家以為中港市場互聯互通係「癡心妄想」，但最後都成為現實。又好似「商品通」，以前好多人對香港發展大宗商品市場潑冷水，但幾年前港交所成功收購LME、現時又正喺前海搞交易平台。「商品通」今日睇嚟雖遙不可及，但五年後可能係現實。
不過有中環人就話，冇錯，滬港通、深港通係開咗，但反應一般喎；收購LME後，近年成交量下跌。有夢想之餘，但要顧吓現實好喎！
余絲韻