Market Insight：房託基金暫避風頭

今次處身撤資潮、升息及中國經濟短期再放緩的陰霾挾擊，就算港股現水平幾平，但缺乏買貨理由，大戶提早收爐，只怕都好難避免陰陰乾提早過快「落」聖誕。

聯儲局議息加息四分之一厘，市場求仁得仁。不過，古勝最為意外是，兩個多月前耶倫先提到美國可能需要高壓經濟，主要是拖長加息步伐，讓低息期延長化解金融危機所產生的產出下滑，勞動力被閒置的結構性問題，勢估唔到六十日之後，高壓經濟唔見咗，仲將尚未上任的「侵侵」擴大財政開支的主張加入考慮，令聯儲局的利率預測大幅上調，至明年可能加息三次之多。

美股行運總有盡時

幻想美麗，現實殘酷，要同時滿足「侵侵」減稅、增加開支，同時又唔郁到國債上限的三個願望，已經超愈經濟範疇，直頭係金融神秘學！聯儲局無耐前仲話，可能需要高壓經濟措施配合，到忽然形勢大好，預測加息三次，甚至超越華爾街廣泛預期的「一次起、兩次止」的想法，除咗同「侵侵」過唔去（尤其是眼中釘的耶倫），你要加乜加飽佢，真係想唔到急轉彎的需要！不過，按呢份攬炒劇本發展落去，隔晚美股又穿頭破腳，短期美股運氣應該用得七七八八。

大戶或部署三叉擊

那邊廂有美國加息，呢邊有內地股市震盪、人仔貶值、規管險資加埋債市係咁跌，中資金融股成為重災區，四大國有內銀加兩大內險股合共拖累港股跌143點，恒指埋單跌咗397點。

港股弱過藥煲，但美電未有明顯走資迹象，不過，古勝八到有私人銀行四圍撩客仔沽港元在價Call、Put，一年收厘幾，跌出7.75至7.85聯匯水平接貨的玩法，一葉知秋，反映街外又有大戶部署，趁中港金融市場近排立立亂，又嚟部署炒港匯脫鈎。會唔會又嚟三叉擊──沽股、沽期指、炒脫鈎三邊投注，即使已經年尾流流，仲係要金睛火眼睇到實。

息口敏感股有壓力

聯儲局話加息步伐會加快，對息口敏感股的本地地產股首當其衝，昨日全線向下。幾隻藍籌地產股如恒基地產（00012）、長實地產（01113）、新鴻基地產（00016）、新世界發展（00017）及恒隆地產（00101）跌幅介乎1.6至3.1%。

除咗地產商發展項目的成本增加，盈利有機會下跌外，當然，需求都係一個影響盈利的重要因素。政府最近一次出辣招係上月四號，至今大約個半月，十一月份一、二手樓交投有所放緩。如果供緊樓，加息某程度上令負擔增加，考慮緊買樓且手頭比較緊的，或者要諗一諗。至於冇咩受影響的，應該係內地客，人仔持續有貶值壓力，內地人紛紛買港樓避險保值，就算加辣後畀多咗稅，亦唔介意。

喺低息環境下，房產信託基金（REITs）係唔少人的投資對象，但隨住息口變化，情況亦有所轉變，多隻股份近月持續回落，昨日表現更差，其中領展（00823）跌4%。短期內，本地地產同REITs難免受壓，暫時避開較穩陣。

古勝