顧問公司Wealth-X早前發表報告話，去年全球有2,473名億萬富豪，佢哋總共坐擁7.7萬億美元（約60萬億港元）身家！人家富貴又關你事？關（口架）。只要由佢哋手指罅「漏」少少出來，都足以影響全球經濟。個報告就數咗全世界最有錢呢2,473個人嘅使錢模式、資產配置同鍾意買乜。
近年經濟不穩，令呢班超級富豪轉揸現金等流動資金。佢哋資產中有22.2%係流動資金，預計明年更會升至23.3%添。
佢哋錢最多花喺做慈善與旅遊。佢哋去嘅係威尼斯國際電影節、新加坡格林披治大賽、摩納哥遊艇展呢類，呢啲係拓展同級數人脈嘅好去處。
有收藏價值嘅奢侈品，佢哋先睇得上眼。最經典係「揸的士」出身嘅中國富豪劉益謙，佢舊年以13億港元投得Modigliani幅名畫《斜臥的裸女》，之前以2.8億港元買咗隻古董盃嚟飲普洱話要「吸口仙氣」。
有22%以上超級富豪認對政治好有興趣。以美國大選為例，億萬富豪往往會透過「超級政治行動委員會」（Super PAC）捐款畀總統候選人同政黨。
富豪最愛Golf？錯，係足球至啱！其次鍾意嘅運動先到高爾夫球與滑雪。絲絲能夠到愛隊主場自拍一張已經係極限！富豪就會「買起」愛隊，好似中國富豪王健林就擁有馬德里體育會20%股份，而車路士班主就係俄國富豪阿布拉莫域（Roman Abramovich）。當然，投資價值亦係「買波」嘅因素之一。
余絲韻