喺信用卡市場做咗三十幾年嘅蘇誠信（Dickson），剛剛轉去銀通做顧問，估唔到，除信用卡市場同銀行業外，仲有個話題會將Dickson話匣子打開。之唔係佢位掌上明珠Priscilla（圖）囉，簡直慈父上身呀！
Dickson同太太都係Banker，對囡囡嘅職業絕對持開放態度。囡囡用六年時間喺英國修讀設計，回港後到某大時裝公司任時裝設計師，除咗基本設計之餘，落廠揀料都有參與。兩年後儲夠「彈藥」，即自設品牌打江山，依家市場包括中、港、台，認真不可小覬。
雖然兩父女年紀差一截，都有共同嗜好──紅酒及雪茄，話說一家三口去澳洲旅行，兩父女有次好優哉游哉咁歎緊雪茄，點知雪茄啲煙飄回室內觸動感應器，好尷尬囉。
囡囡事業有成，Dickson依家最唔放心係囡囡仲未搵到另一半（其實囡囡依家仲好年輕咋！），佢話Priscilla鍾意成熟型，絕對係俏郎君嘅羅拔烈福嗰款，Dickson笑言到時唔知點稱呼喎！「唔通叫兄弟咩？！」
余絲韻