絲絲講場：今晚港交所搞雙色派對
聖誕快到，各大公司都會舉行聯歡派對，今日（15日）就輪到香港交易所（00388）舉行周年晚宴。年年港交所Annual Dinner都會大搞噱頭，過去就玩過懷舊Feel，個個着晒唐裝衫。有一年就玩美國牛仔主題，去年仲誇張，主題係「Superhero」（超級英雄），個個員工要蝙蝠俠、超人、神奇女俠同美國隊長上身，仲搞到中環的Superhero服飾突然缺晒貨，超級盞鬼！
藍紅自由配搭
正當大家期待今年港交所唔知咩玩法時，絲絲索到料，今年晚宴卻係反高潮，唔需要再扮角色，Dress code（穿衣標準）好自由，只需配合港交所的形象顏色就可以。
睇番港交所的Logo，主要由藍色同紅色構成，如果Dress code只係咁，咁就簡單得多了，起碼唔會搞到中環一時間缺貨啦！其實，有時候反璞歸真都係好事。
至於一向玩得的行政總裁李小加，今日咩玩法？以小加性格，又點會咁快話你知，唔到最後一分鐘都唔知佢會有乜驚喜畀你！
余絲韻