絲絲講場：結婚卅載話唔夾債王被撇

「債券大王」格羅斯搞緊離婚！佢第二任太太Sue喺上月尾向洛杉磯法院提出離婚申請，結束兩人三十一年婚姻。好地地做乜要分開呀？該離婚文件只係透露雙方存有「不能調和的分歧」，簡單講兩個字「唔夾」，結咗婚卅年忽然唔夾？太太嗰邊冇再解釋細節，至於格羅斯嘅發言人亦一樣封口。

其實，佢哋兩夫婦一向都熱心公益，成立咗個叫William and Sue Gross嘅家族基金會，至今已經捐出近八億美元。

嗱，一講到離婚，好難唔提家產嘅，離婚申請文件中話債王太阿Sue尚未清楚佢哋兩夫婦嘅資產與負債幾多。不過按花生友估計，格羅斯身家約有廿一億美元（約一百六十三點八億港元）。

再睇多眼，咦？債王太代表律師Laura Wasser，咪係嗰個專幫人搞離婚嘅金牌律師！安祖蓮娜祖莉同Kim Kardashian等都係佢嘅客，一啲都唔簡單！都係嗰句，一齊咗卅年忽然唔夾？定係咩呢可……債王今年都七十二歲咯。

余絲韻