想有好日子過，首要識理財。懶計數？懶有懶嘅做法，以下5招一樣Work，擺脫「長期糧尾」嘅悲慘。但若睇都懶得睇，咁絲絲幫你唔到。
做年度財務預算，比每月Plan一次更實際。拉勻一年計，預鬆3%，更有彈性，更易走棧。
買車、買新手機、買電視時，事先Set定Budget，研究話反而會使多過冇Budget。事關人不自覺會揀Budget內最貴嗰件，如果齋睇產品性能，可能會揀件平啲！
其實老友同屋企人比「外人」更了解你點使錢，研究話最好搵識咗13年以上、信得過嘅老友。
將用嚟交租、雜費、行街、食飯等戶口全部分開，唔好集中喺一個，每月分配好入錢落去。之後盡情使，使到零都冇有怕。
嫌上面4招唔夠辣，就要試吓唔帶信用卡出街，銀包只放金牛。事關人唔捨得將大紙使出去，身上只有大紙，冇咁衝動。
余絲韻