絲絲講場:孖住特朗普女有乜好選宅

香港樓價係咁升,查實美國都一樣,美國樓價中位數已經連續55個月錄得按年升幅,聽講樓價仲有排升!

傳遷華盛頓豪宅

不過相信美國候任總統特朗普個女伊萬卡(Ivanka Trump)未驚過,有傳佢一家五口打算由紐約曼哈頓搬去首都華盛頓,想住近啲白宮喎。

佢阿爸特朗普嘅發言人都未正式確認,就已經有外國媒體自動幫呢位準第一千金搵屋!認命吧,又索又有錢又有權勢,係咁喇。葡萄完,不如花生吓,睇吓佢喺華盛頓有啲咩盤揀。

齋睇Georgetown已經有兩個選擇。圖B呢間屋行現代風格,唔計花園,室內面積5,680方呎,6房4廁,伊萬卡五口加多一、兩個保母都夠。最大賣點係頂層主人套房嘅天窗,點少得嘅Walk-in Closets,仲有埋恒溫泳池,盛惠7,800萬港元左右。

6000萬港幣起跳

嫌冇特色?同區仲有9房9廁古董豪宅(圖C)。有幾古?豪宅建於一七九七年,有219年歷史,每塊磚都係當年由英國運嚟,仲有塊牌寫明係古蹟,大概6,000萬港元就可以據為己有。

其實仲有平少少嘅,喺卡洛拉馬(Kalorama)有6房5廁豪宅(圖A),賣緊大概4,500萬港元。不過有消息話奧巴馬卸任後搬嚟呢區住,睇怕伊萬卡都未必想揀呢間。唔想同奧巴馬撞口撞面,要揀番上面嗰啲,6,000萬港元係起跳價。

返嚟香港,6,000萬買到啲乜?哦,新樓有南區‧左岸,實用面積都有1,907平方呎,喺鴨脷洲。想住House?得,沙田駿發山莊有間1,696平方呎獨立屋,不過樓齡拍得住伊萬卡本人,有成33年。

余絲韻