為咗飲免費咖啡，你可以去到幾盡呢？前排友邦香港（AIA）推出「AIA Vitality健康程式」挑戰AIA客戶，只要每日行7,500步，一星期達標五日，就可以免費換杯咖啡，最多換12杯。
參加人數近9萬人，超過六成係女性！可惜一半人連一杯都「行」唔到番嚟，換到12杯咖啡嘅有3,000人，即係得3%。推廣期間，用戶總共行咗超過170億步，相等於環繞地球340次，咁又幾有睇頭。
錯過換咖啡？嗱最新又有活動，話為咗激勵大家繼續接受挑戰，佢哋仲會抽獎送智能手機、智能手錶、健身會籍同購物現金優惠券等等。睇今次又有幾多人堅持到！
余絲韻