絲絲講場：格老自認講嘢靠嚇
聯儲局前主席格林斯潘九六年十二月五日嘅演說，以「非理性亢奮」（Irrational Exuberance）形容當時市況，令呢個詞在當年即刻變成潮語。廿年後嘅今日，格老認當年用呢個詞係想靠嚇，仲自認論準確度只攞「C」！
睇番格老當年咁講時，標指兩年升幅超過60%，係40年來最勁，格老一拋「非理性亢奮」呢幾隻字出嚟，股市雖窒過一窒短暫下挫，但好快反彈，之後升勢更一直持續多超過三年，直至科網泡沫爆破。明顯，格老靠嚇呢招唔Work囉。
「非理性亢奮」唔Work還唔Work，但就變咗潮語，仲紅到出金融界外，諾貝爾經濟學獎得主席勒亦用呢個詞做書名。○六年格老卸任，美國諷刺時事節目《The Daily Show》亦用「非理性亢奮」做特輯名。
滯脹機會過半
睇番今時今日，美股近期係咁創新高，不過格老話依家要擔心嘅，唔係股市，而係債市債息近期抽升。佢又憂慮步向滯脹（即是物價升嘅同時，經濟增長低迷），仲話機會率已過一半。樓市？格老認為由得佢，等有事時再算。
至於格老呢個「非理性亢奮」經典潮語點嚟？原來係佢某朝沖涼時喺浴缸諗出嚟嘅！
余絲韻