我要做財演：港式財金Talk 大媽好受落

蘇沛豐每年北上約十次，會到內地一、二線城市舉辦金融講座，觀眾一般是全職投資者或退休人士，擁有可觀的資金作投資。他不諱言，「佢哋有啲以前係老闆嚟！」可想而知，要舉辦這些講座，財演少點功力都不行。

他續說，「我多數單拖上陣，仲要一講就講三個鐘。」至於香港的講座，同場會有數位嘉賓出席，且每位嘉賓通常只分享自己較擅長投資的資產或板塊。財演在內地講Talk，不但要有膽量，也要對各行業板塊熟悉，才能面對內地投資者的提問。

鍾意跟風炒毫子股

生意人及金融講師到訪內地，往往要跟當地人交談，普通話水平要很高嗎？蘇沛豐向同學派定心丸，「你哋新一代，講普通話一定掂喇！」他分享，講師所需的普通話水平未有大家想像般高，「其實講普通話唔使好叻，溝通到就得。」

他更帶點自豪的說：「內地客聽到我啲普通話有香港口音，反而會覺得我係香港地道嘅專家。」惟他補充，「佢哋最在意嘅，都係我講啲嘢有冇邏輯，同埋畀嘅貼士準唔準。」

經常在港開Talk Show的蘇沛豐，會怎樣比較兩地投資者的口味？他指，「大媽炒股，好多人都以為佢哋係盲舂舂亂炒，但有啲散戶其實有興趣分析股份基本面，搵投資機會。」蘇沛豐指，「喺講座中嘅問答環節，內地投資者幾鍾意問毫子股，或者國際政治局勢。」

他續說，「我會灌輸啲價值投資方法畀佢哋，成個Talk就好似教育講座，例如教佢哋買唔同類別嘅資產，以分散風險。換轉係香港嘅投資者，佢哋講求實用性，鍾意問股票Number。」

「對住內地人，我會用簡單易明嘅演繹方式去講解港股投資策略，因為佢哋可能冇買過港股。」他亦較常推介新經濟行業股份，「科技、醫藥同新能源股份嘅增長快啲！軟件開發公司會畀投資者更多想像空間，所以科技股炒上機會大。」

教買藍籌 分散風險

大學生John好奇問，「你點同佢哋講買港股嘅好處？」蘇沛豐答：「人民幣貶值，佢哋除咗買最熟悉嘅A股，應該投資吓啲有海外業務嘅企業，以分散風險，唔好將所有雞蛋放落同一個籃。」他有跟內地投資者提及主營香港業務的恒生銀行（00011）及新鴻基地產（00016），另外亦推介滙豐控股（00005）及友邦保險（01299）等。

「香港有完善嘅法制及監管，企業管治又好啲，容易搵到好股。再者，港股價格變動較理性，投資者可研究公司年報去捉路。」他說，買港股可炒即日鮮，可能更適合愛短炒的內地投資者。A股指數的市盈率比港股高，港股相對顯得更吸引。