孖妹S檔案：A股玩家「深」態大剖白

證券界

鄭：英大證券研究所研究員 鄭罡

兩地趨向價值投資

彩兒：深港通終於通車，嚟，一齊飲番杯……茶先！

鄭：喺滬港通開始，中港兩地市場加深聯動，投資使用額度有所增加，可見深港通開通對參與對方市場便利性有好大幫助，且有助培養內地股民成熟投資理念，港股對深圳投資者而言，意味有更多便宜、優質股選擇。

鄭：不過，深圳股民偏愛小型股，見到火爆行情又會跟風炒，相信兩地投資文化差異喺短期內難以消失，但有一點係兩個市場都一樣開始關注，就係趨向價值投資，顧及近兩年人民幣匯價趨跌，估計深圳投資者會對香港藍籌股有興趣，特別係佢哋熟悉嘅公司或高派息公司。

鄭：兩地投資文化與兩地股市機制有莫大關係，對監管環境亦有關係，在內地，小股民更關注小型股，股價跌得極低嘅情況少見，但港股股價保持低位嘅情況普遍，深港通開通後，相關風險不容忽視。

用港理性分析部署

Kitty：深圳股民最鍾意炒細價股同創板股，若香港股友炒深股，係咪應該跟風？

鄭：香港投資者有國際視野，亦經歷過各樣成熟市場發展嘅過程，雖深圳小型股無論係估值水平、成交活躍度及換手率都遠大於港股市場，但內地對市場規管亦愈來愈嚴格，即使小型股近期回落，但對於香港投資者來說風險較大，要留意呢類小型股炒得過高嘅風險，從成熟嘅投資理念嚟講，就應該喺合適價位買入合適股票，而非因行情而去追漲殺跌，咁係唔理性。

鄭：中小型股估值較高，要由中國高科技與互聯網發展去選股，逐間公司深入了解，深股市場好多時啲題材股，若有一隻爆升，就會成個板塊跟住漲，所以要由上市公司主業、行業地位及行業發展中嘅角色去揀股，要用番香港理性分析嗰套去投資，唔應該純粹睇市況。

留意深市低估值股

彩兒：部分深股成日改名，想魚目混珠，但往往都爆升得好勁，媽呀，我好亂啊，究竟乜深A股「錢途」最好？

鄭：深股中嘅藍籌股比起香港上市嘅估值會貴啲，所以反而有啲香港市場冇嘅公司，特別係金融、地產及基建板塊嘅低估值股份，較值得關注，主因深港市場逐步開放，未來會有更多機構投資者參與，前景亮麗。

鄭：揀金融股，最緊要估值平、要睇企業核心競爭力、有冇發揮空間及行業前景，喺銀行、保險同券商三大領域中，我覺得券商同保險股增長潛力較高；基建股方面，中國基建喺環球前列，未來受惠城鎮化需求，與海外一帶一路嘅政策、發達與發展中國家嘅基建需要，內地基建公司有專業、高效及低成本優勢；內房股嚟講，地價被炒高，投資成本增，未來行業會由質量同服務上提升，龍頭股佔優。

散戶 金融系畢業生

姜：深圳散戶 姜宇

擬炒港股 首選騰訊

Kitty：你就好啦，啱啱大學畢業，就已有幾年炒深股經驗，父母仲要畀成20萬元人民幣資金你炒！

姜：我讀金融系出身，未來想做基金或投資管理公司，對投資好有興趣！今年A股走勢唔錯，我嘅整體投資有一成以上盈利，雖深圳股民比較鍾意炒小型股，但我一直傾向價值型投資，有六成資金投放喺大型股，四成資金放喺中小型股同創板股，後者主力科技股。

深圳大細股玩法不同

姜：我選股着重股份往績同業績表現，也留意公司發展、目標，同埋公司財務情況。另外，炒深圳大型股同小型股嘅方法好唔同，前者可揸長少少，但後者要好小心，因好多時中小型股同創板股市值細，唔少市盈率高到嚇人，所以只係適合短炒。

彩兒：你點睇深港通？第日會唔會進軍埋港股？

姜：深圳散戶常盲目追風炒中小型股，我覺得深港通通車後，受港股市場帶動下，深圳投資者會趨向專業化，投資態度會有改善。

姜：我對港股好有興趣！因深港通係中國投資市場開放嘅體現，港股無論係定價、估值方面都比A股均衡，我會對一啲有發展潛力嘅高增長股較有興趣，當中騰訊控股（00700）會係首選，喺港股通（深圳）名單內嘅股份，如招商局港口（00144）、深圳國際（00152）、中國光大控股（00165）呢類我比較熟嘅股份，會留意多啲。

散戶 深交所OL

黃：深圳散戶 黃小姐

吼港藍籌 睇重派息

Kitty：靚女，有冇部署過深港通概念股？

黃：隨住深港通開車，預計深港兩市喺年尾表現會有好轉，我爸爸有留意，但我依家冇乜閒錢入市炒，未來會等認識多啲再算，若有大型金融企業搞深港通相關講座，我會拉埋老公去聽！

主力長揸中大型A股

黃：我特別關注香港藍籌股，若入場門檻低啲就好，會鍾意一啲業績平穩、每年有穩定派息嘅公司，其中一啲平時多接觸嘅企業，如恒生銀行（00011）、青島啤酒股份（00168）同埋華潤系股份，我都會多留意，特別係央企！因大到不能倒嘛。

彩兒：你喺深交所做文職，會唔會閒時收到好多風？

黃：邊有吖，我主要都係跟爸爸炒，係舊年三、四月開始炒股，一開始就遇到大時代，主力炒大型股，上半年都有賺，但冇耐就遇到股災，跌得咁急反應唔切，去到舊年十一月先忍痛斬纜，最終蝕咗五成。

黃：去到今年三、四月我先入番市，主力都係長揸中大型股，滬深A股我都有炒，當時買入4隻股份，上星期沽出當中嘅瑞和股份（002620.SZ），賺幅有六成，其他股份就仲有微蝕。

散戶「深」痛男

王：深圳散戶 王先生

去年教訓嚇到縮沙

彩兒：講起股市，你個唏噓樣就走晒出嚟，因乜解究呢？

王：我以前一向都炒開深A股嘅，不嬲成績唔錯，但近年我睇唔通個市，舊年大漲後即刻出現暴跌，搞到我啲中小型股責死晒，依家咪諗住休息一排，唔炒住囉，身邊有好多朋友都同我一樣情況。遲啲若股市行情好，先再動身，依家完全唔敢郁，皆因未驚完。

唔熟港市 興趣欠奉

Kitty：身受深股情傷，或者港股可令你重拾信心呢……

王：我有喺新聞聽到深港通消息，但我依家已完全冇炒股，加上對香港市場完全唔熟，好少留意，所以冇興趣，再者，我覺得深港通對推動深股唔會有大幫助。

彩兒：希望你啲持股生生性性，快啲返到家鄉啦！

彩兒 Kitty

若有料報畀彩兒同Kitty或有嘢問，可電郵money.biz@on.cc